640/2023-2024

Lunglei the 31st May, 2023: World No Tobacco Day 2023 pualin vawiin chawhnu khan National Tobacco Control Programme (NTCP) Lunglei District hnuaia Tobacco Control Cell buatsaihin Bethesda Higher Secondary School, Lunglei ah vaihlo leh a kaihhnawih laka fihlim tura inzirtirna, "Eitur hrisel ching rawh, Vaihlo ni lovin" (Grow Food, Not Tobacco) tih thupui hmang a neih a ni. He hun ah hian Pu Donny Lalruatsanga, Deputy Commissioner, Lunglei chu khuallian a ni.

He hun hi Dr. Zoramthangi, District Nodal Officer, NTCP, Lunglei chuan kaihruaiin Pu Donny Lalruatsanga chuan World No Tobacco Day 2023 Bethesda Higher Secondary School a kan hmang thei hi lawmawm a ti a. Vaihlo hian mihring taksa ah hrisel lohna tam tak thlen in, thihna hial pawh a thlen thei a ni. Tunhma chuan Mizo society leh vaihlo hian inkungkaihna a nei thin a amaherawhchu khawvel a lo changkanga Mizoram sorkar pawhin vaihlo free state  ni turin nasa taka hma a lak bakah zirna in te hi Tobacco free Educational Institution a puang vek turin sorkar in a ruahman thu a sawi bawk.  Vaihlo hi kan chhungkua leh khawtlang ah kan fihlim a kan do a ngaih thu  sawiin Tobacco Free Generation hi Mizoram hmathlir a ni a, tuna zirlai te hi chumi atana hmanrua an nih thu a sawi bawk.

Dr. Lalnunsiama Renthlei, District Consultant, NTCP Lunglei chuan report pein kum 2022 chhungin  Lunglei District chhungah School leh College 22 ah awareness campaign neih a ni a, NGO's leh kohhran pawl hrang hrang  ah awareness campaign vawi 4 neiin training vawi 1 bakah Squad Drive vawi 31 leh meeting vawi 1 an neih thu a sawi a, kum 2016-2017 Global Adult Tobacco Survey-2 ah Mizoram chu India ram ah vaihlo hmang nasa state ah 2na a ni a, Global Youth Tobacco Survey ah zirlai 8.5% te chu vaihlo ti thin an nih thu a sawi bawk. Kum 2022 chhungin vaihlo nghei tum mi 350 ten damdawi in pan tawh in, kum 2009 atang khan tun thlengin  mi 6589 ten vaihlo leh a kaihhnawih nghei tum in damdawi in an pan tawh bawk a ni.

Vaihlo leh a kaihhnawih nghei duh te tan engtik lai pawhin  Lunglei Civil Hospital Room No 11 ah a pan theih reng a ni.