641/2023-2024

01.06.2023 : Nimin May 31, 2023 khan Mizoram Rajya Sabha MP Pu K. Vanlalvena chuan Champhai District khaw thenkhat Vaphai, Farkawn leh Zawlsei te tlawhin Myanmar raltlante awmna leh an dinhmun te a en a. Heng khuaah te hian thu sawiin Pu Vena chuan, MNF sawrkarin raltlante a lo tanpui chhan hi vote hmuh belh beisei vang ni lovin "kan unau ten tanpui an mamawh tih kan hmu a kan tan pui mai zawk a ni", a ti a. "Chu chu Mizo Kristian te nunphunga bet a ni" a ti bawk. Pu Vena chuan khawtlang hruaitute leh NGO hruaitute bakah mipui ten raltlante hmangaih taka an lo tuam hlawm thin chu Pathian duhzawng a ni ngei ang tih a rin thu a sawi a ni.

Vaphai ah hian khawtlangin an buatsaih, Vaphai High School leh Higher Scondary School atanga class 10 leh class 12 exam ten an passed kim vek lawmna programme a hman pui a. Zirlai pungkhawmte hnenah fuihna thu sawiin Pu Vena chuan zirlaite chu hmalam huna hlawhtlinna nei turin mi awmthei fa nih leh mirethei fa nihin danglamna a nei lo, a ti a. Rilru mumal tak nei chunga tumruhna leh Pathian tihna nen chuan lehkha zirte hlawhtlinna tur hi tumahin an dal thei lo, tiin Pu Vena chuan zirlaite chu tumruhna nena lehkha zir turin a fuih a. Vaphaia Myanmar raltlan zirlai awm mek ten hnam lam an lo entir a ni.

Pu Vena chuan Vangchhia khaw daia Kawtchhuah ropui a tlawh nghal bawk a. He hmuna lungphun leh pipute sulhnu chi hrang hrangte chu "kan pi pute sulhnu ngei a ni tih rinhlelh tur a awm lo", a ti a. Mi thenkhatin Hindute sulhnu niawm taka an sawi thin hi thil hriat chian loh vang a nih a rinawm thu leh India ram hmun hrang hranga hmanlai Hindute lungphun leh Vangchhia khaw daia lungphun te hian inlaichinna an neih a rinawm loh, tiin Pu Vena chuan a sawi a ni.

Pu Vena hi Pu HC Lalmalsawma Zasai MDC Mara Autonomous District in a tawiawm a ni.