642/2023-2024
Lunglei the 1st June, 2023 – Pu Donny Lalruatsanga, Deputy Commissioner & Chairman, District Disaster Management Authority, Lunglei chuan fur laia district mipuite him tlan theih nan 31st May 2023 khan a hnuai ami ang hian thuchhuah a siam.
Fur hun a lo thleng hnai leh ta a, chhiatna hrang hrang heng- tuilian, leimin, lei tawlh, lei tlahniam, lungrem chim, chenna in chim leh a dangte thleng thei reng a ni. Heng chhiatna lo thleng thin thenkhatte hi chu a hun taka fimkhurna leh invenlawkna lam hna lo thawh chuan pumpelh theih a ni thin. Hetiang chhiatna thleng thei lakah hian Lunglei district huam chhunga Village Council/Local Council, Village/Local Level Disaster Management Committee te leh mipuite theihtawpa inveng turin leh mahni in leh a chhehvel, mahni khua leh kawngpuite uluk lehzual a venghim turin kan inchah a ni.
Chhiat tawhna a thlen a hriattur pawimawh thenkhatte a hnuaiah hian tarlan a ni e:
1. Kan in bul velah tuiluankawr/side drain tha lo a awm a nih chuan ngaihthah lovin siamthat nghal thuai tur a ni. Tuiluankawr hnawha bawlhhlawh paih hi leimin siamtu lian tak a nih avangin tih hauh loh. tur a ni.
2. Chhiatna engpawh a thlenin mahni bialtu Zonal Officer te hriattir nghal vat tur a ni a, an thu ngaichangin a tul anga hmalak zui tur a ni.. Lunglei Town Area-a chhiatna thleng chu a thien ni (date of incident) atanga kar khat chhungin ziakin Deputy Commissioner office-ah thlalak nen thehluh tur a ni a. Lunglei Town area pawn lam chu a thlen ni atanga thlakhat ral hmain thlalak nen theh luh tur a ni.
3. Rikrum thilah ziaka report thlen hman loh chang a tam a, chutiang a nih pawhin chhiatna thlen hun ni leh darkar chhinchhiah nghal a, thlalak felfai tak neih tum tur a ni. Remchang hmasa berah ziakin thlalak nen report hi thehluh tur a ni. Thenfai/senghawi hna kan thawk a nih pawhin report ah hian thenfai hma leh thenfai hnu thlalak felfai tak, khawl leh mihring tha kan chhawr te tarlan thin tur a ni.
4. Kawngpui ah leimin emaw chhiatna dang a thlenin a bialtu PWD Officer emaw, a enkawltu Company (NHIDCL, ABCI, BIPL etc.) te emaw hriattir nghal vat tur a ni.
5. Tul bik avanga debris clearance (leimin paih fai) hnathawh ngai a awm chuan bialtu Zonal Officer hriatpuina in chumi atan bik report-na tur proforma duan a ni a, he form hmang lo a dilna/report lutte chu pawm a ni lo ang. Tin, Zonal Officer te hriatpuina ni lova mahni thua leimin thenfai hna leh hna dang lo thawh a, a hnua bill submit leh te chu pawm a ni lo ang.
6. Mimal hnen atanga harsatna emaw chhiatna thleng report ah reng reng Village Council/Local Council te hriatpuina felfai tak a tel ngei tur a ni.
7. Silpauline dilna ah reng reng an mamawh chhan chiang taka ziakin, thlalak fiah tha tak leh Village Council/Local Council hriatpuina a tel ngei tur a ni. Silpauline dilna hi Lunglei Municipal area huam chhunga awmte chuan Deputy Commissioner office-ah thehluh tur a ni a, midang zawng chuan bialtu Block Development Officer hnenah thehluh tur a ni.
8. Chhanchhuahna hnathawh ngai a awmin (leimin avanga in chim etc.) bialtu Zonal Officer bakah Police leh Health Department te a rang thei ang bera hriattir nghal tur a ni.
9. Fur laia ruahsur leh thli tleh hian tek (lightning) a ken tel theih avangin thli tleh laiin electronic thil hman loh tur a ni a, electric line pawh off thin tur a ni.
Fur atana Hriattirna_LLI_31052023.pdf
