Vawiin chawhnu dar 1:00 khan RNTCP Conference Hall, Lungleiah World Population Day 2017 hman a ni a, Dr. Malsawmtluanga Fanchun, BDO Lunglei Block chuan khuallian niin a hmanpui. Kumin World Population Day thupui chu “Beiseina Thar, Hmasawnna Thar, I Chhungkaw Hmasawnna Chu I Mawhphurhna a Ni” tih a ni. 

He programme vekah hian sawrkar laipui ruahmanna angin ‘Population Stabilization Fortnight’ 11th July 2017 - 24th July 2017 hawn a nih bakah Dengue natna do thla - Anti-Dengue Month (July 2017) pualin hun hman a ni bawk. 

Dr. Malsawmtluanga Fanchun chuan World Population Day rawn chhuah na chhan bulpui ber sawiin, khawvela mihring pung chak lutuk avanga harsatna rawn awm te leh a nghawng thalo tamtak laka kan inven theihna atana he Ni hi kum 1987 July ni 11 atang khan khawvelah hman tan a ni, a ti a. World Population Day in a tum pawimawh ber pakhat chu ruahmanna fel tak neia chhungkaw din leh enkawl (Family Planning) a nih thu sawiin, in nawr luihna awm miahlo a Family Planning kalpui zel a pawimawh thu kalkhawmte a hrilh a. Mumal taka Family Planning kalpui anih theih nan leh World Population Day thiltumte a hlawhtlin ngei theih nan Reproductive Health Services lamah awareness campaign uar taka kalpui a ngai a ni, a ti bawk. 

World Population Day 2017 hmanna inkhawm hi Dr. VLMS Dawngliana, Chief Medical Officer, Lunglei chuan kaihruaiin, World Population Day thil tum hrang hrangte a tarlang a. Sawrkar laipui chuan Population Control a ngai pawimawh hle a, Mizoramah pawh hlawhtling takin kalpui mek a ni tiin, hemi lama thahnemngai taka thawk thin tute ASHA workers, nurse leh doctor te chungah lawmthu a sawi a.  ‘Population Stabilization Fortnight’ 11th July 2017 - 24th July 2017 hun chhung hian Population Control lama hman chi indanna hmanrua hrang hrang hospital leh sub-center ah te Health Department chuan an phochhuah tur thu kalkhawmte a hrilh a. Dengue natna do thla Anti-Dengue Month (July 2017) chungchang pawh sawiin, Dengue natna hrik hian Mizoramah kua a hreuh tawh avangin Dengue Thosi (Aedes thosi) laka kan inven theih dan tur hrang hrang a tarlang a. Dengue natna hi thosi atanga inkaichhawn a nih avangin thosi pian theihna reng reng kan siam loh a, thosi tirem turin DDT kan hman a ngai a ni, a ti bawk. 

World Population Day 2017 hmanna inkhawm hi Dr Lalawmpuia, SMO Lunglei in lawmthu sawiin hun tawp a khar a ni. 

World Population Day-hi United Nations Development Programme (UNDP) duan chhuah niin kum 1987 July ni 11 atang khan khawvelah hman tan a ni a. Khawvel mihring pung chak lutuk tur laka inven leh inzirtir nan he Ni hi hman thin a ni.