Vawiin chawhma khan PHED leh YMA Sub-Hqrs. Lunglei te buatsaihin Convention Centre ah World Water Day hman ani . Pi K. Lalrinzuali, Deputy Commissioner, Lunglei chu khualiian niin a hmanpui. Kumin World Water Day thupui chu tumah hmaih awmlovin (Leaving no one behind)tih ani.

World Water Day hmanna inkhawm hi Pu Lalduhawma Hnamte, Finnacial Secretay, YMA Sub-Hqrs, Lungleiin kaihruaiin Pi K. Lalrinzuali chuan United Nations chuan hmasawnna ngelnghet rawn thuam chak tur hian UN 2030 Agenda atan kum 2015 khan Sustainable Development Goals puanchhuahah kan zavai a tan tui intlak chhawpchhuah chu a thiltum lian 17 zinga 6na ah dah a ni a, hemi anih avang hian riltam  leh retheih awmlohna tura a pawimawh ber chu tui thianghlim hi a ni. Mihring hriselna, nunna mai bakah nitin khawsaknaah  tui hi a pawimawh a, ram a changkanga sorkar in PHE Dept. kaltlangin  tui thianghlim kan dawnga, amaherawh chu kan nun hi kan inthlahdah ta deuh nge ni sorkar hi kan ring ta lutuk hi enchian a ngaih thu a sawi. Kan ram, kan khawtlang enkawlna kawngah te sorkar ring lovin mahni a intohdelh a tul thu a sawi bawk. Mihring kan punga tui mamawhna a sang tial tiala kan tuikhur awmsa leh tuihna hna tha kan neih tam theihnan tan lak a ngaih thu a sawi. Fur ruahtui khawl a hman tangkai dan thiam a pawimawh in Rural Development Dept. hmalaknain MREGA hnuaiah dugout point siamin fur ruahtui tling khawm hian tuihna a ti pung thin ani. Sorkar ah chauh innghat lovin khawtlang angin tuihna tih pun hi kan tihtur a ni ati bawk.

Pu Lalrotluanga, President, YMA Sub-Hqrs Lunglei pawhin thusawiin khawvel ah mihring tluklehdingawn chuangin tui thianghlim in tur nei lovin natna hrang hrang an vei thin a, kan ram ah pawh tuihna kan neih te a  kangchat lohnan tihpun leh tih thianghlim hi YMA, khawtlang nu leh pa leh thalai ten mawhphurna sang tak kan nei a, a kum telin tui mamawhna a sang a, tuihna a tlem a, kan ti bawlhlawh bawk thin hi pawi a ti a, Sipai lui thenfai ngai ta hial hi nang leh keimah vang a ni ati bawk. Tuihna tihpun dan kan ngaihtuah loh chuan kan tu leh fa ten an la tuar dawn ani tiin kan tui tlanna hnar te hi ramngaw a siamin tuihna i ti pung ang u ati.

Er. Allan Lalthalura, EE, PHED, Lunglei in World Water Day hman chhan sawiin United Nations Conference on Enviroment and Development chuan tui intlak lawmna ni atan March ni 22, 1993 hi a thlanga a, hemi kum atang hian kumtin thupui thlan bik neiin khawvel hmun hrang hrang ah hman a lo ni ta ani. Mizoram ah a vawikhat nan World Water Day hi District hrang hrang ah hman ani ati, Mizoram lui lian zawng zawng hi PHED chuan khawl hmangin nasa taka hipchhuah ani tawh a, heti chung pawh hian mitin tan tui kham khawp la pe chhuah theih lovin Mizoram mipui 25% hian englai pawhin tui khawp kham dawng lo an la awm thu a sawi. Khawtin hian tuihna humhalh nan tuihnar ram chereu tur ven, tihbawlhlawh thei laka chhanhim leh tuihna ti pung zawnga hmalak a nghaih thu a sawi bawk.