Vawiin khan Animal Husbandry & Veterinary Department bultumin AH & Vety Complex, Farm Veng, Lungleiah vawk vulh thlangtu chhungkaw pariat te hnenah NLUP 3rd & 4th Phase sem a ni a, Lunglei DC Pi Lalzarmawii, IAS chuan NLUP tanpuina a hlan.

Pi Lalzarmawii chuan sawrkar duhdan angin tualchhung vawk note hriatchian sem a nih hi a dawngtu te tan vulh a phurawm dawn hle a ti a, taima tak leh phur taka vulh theuh turin a chah a ni. Vawkpui vulh hi uar tura a duh thu sawiin, vawk note hralhna ah pawh harsatna a awm loh tur thu a sawi. Ranvulh chungchangah Mizote hi kan in zirchian a ngai tiin, an hrisel zawk theih nan a enkawl dan dik kan hriat a pawimawh hle a ni, a ti.

Vawk note semna inkhawm hi Dr. Vanlalbuanga, DVO Lunglei in a kaihruai a, vawiin vek hian Lunglei District chhung hmun hrang hrangah NLUP 3rd & 4th Phase hnuaia Piggery Farming thlangtu Beneficiary 19-te hnenah vawk note 58 sem a ni. Tun tum ah hian beneficiary tin te hnenah vawkpui tur pakhat leh vulh thau tur pahnih, a vaiin pathum theuh sem an ni.