Vawiin khan Saikuti Hall-ah Lunglei khawpui chhunga eitur siamtute leh zuartute tana eitur thianghlim siam chungchang inzirtirna "Awareness Programme on Food Safety for Food Business Operators" neih a ni a. Lunglei Bawrhsap Pi Lalzarmawii, IAS chuan khuallian niin he hun hi a hmanpui.

Pi Lalzarmawii chuan thu sawiin khawvel changkang zelah science thiamna khawl hmangin ei leh in tur sawngbawl niin, heng ei leh in tur an siam te hian chaw ei dawhkan a thlen hma in thil tam tak a paltlang a, ei tur hrisel buatsaih tur chuan a siamtute leh a zuartuten mawhphurhna sang tak an nei, a ti. Licence leh Registration te  ngai pawimawh a, dan leh dun zawm tura chahin mitin mamawh hriselna atana pawimawh a nih avangin uluk leh fimkhur taka eitur sawngbawl turin DC chuan kalkhawmte a fuih a ni. 

Khualzahawm Pu Lalsawma Deputy Food Safety Commissioner pawhin eitur thianghlim siam chungchangah a thawktuten dan leh hrai an hriat chian a tul thu leh mipui hriselna kawngah eitur siamtuten mawhphurna an neih san zia a sawi bawk a. Pu F. Lalliantluanga DO, DHS Aizawl chuan 'Overview of FSS Act, 2006, Rules & Regulation 2011 chungchang zirtirin eitur siam lama eizawng ten Licence leh Registration neih a pawimawh dan leh eitur thianghlim tawklo pek chhuah avanga midangin harsatna an tawh chungchanga hremna awm thei hrang hrangte Power Point Presentation hmangin a sawifiah a. Pi Lalrinkimi Pachuau FSO, DHS Aizawl pawhin Thianghlim zawk a eitur siam dan leh a vawn that dan bakah faina atana hriat tur leh mamawh hrang hrang te a zirtir a ni.

Vawiin eitur thianghlim siam chungchang inzirtirna programme hi Pu Lalchhandama, Designated Officer Food & Drug Controller in a kaihruai a; Lunglei Veng hrang hranga eitur siamtute leh a zuartute an tel a ni.