Nimin chawhnu khan Lunglei Bawrhsap Dr. Ankita Chakravarty,IAS, Lunglei SP Pu C. Lalthanmawia leh Election Official dangte hovin DC Conference Hall ah Lunglei District Press Meet on Mizoram Assembly Election 2018 neih a ni. He hunah hian official-te leh Lunglei District MJA member-ten Mizoram Assembly Election 2018 chungchangah inkawmhona hun tha tak an hmang.

Dr. Ankita Chakravarty chuan Lunglei District huamchhunga Assembly Constituency 7 ah Returning Officer 4 an awm thu leh Polling Station 185 a awm thu bakah September ni 27, 2018 chinah voter 1,04,863 an awm thu a sawi. Polling Station tin ah EVM leh VVPAT hman anih tur thu leh heng khawl te hi endikin a thalo te chu thlak an nih thu a sawi a. EVM leh VVPAT hman dan Awareness Campaign ngawrh taka kalpui mek zel a nih thu a tarlang a. Kumin inthlan thupui ‘Accessible Elections’ a nih angin pianphunga rualbanlote polling Station pan tura harsatna nei te tan anmahni tanpuitu an awm dawn thu leh transportation thlenga ngaihtuah sak anih tur thu a sawi. Kum 2013 inthlanna vote tla chu 84% a nih thu sawiin tun kum ah chuan 90% aia tam tinzawn anih thu a sawi a. Expenditure Monitoring Team, Flying Squad leh Static Survaillance Team ten hma an lak mek thu Bawrsap chuan a sawi. Bial tina Polling Station pakhat theuh ah hmeichhia hlang duty na tur Pink Polling Station ruahman a nih tur thu leh Lunglei Disitrict ah Critical Polling Station 7 a awm thu a sawi. Saikuti Hall ah Strong Room pawh venhimna tha tak hnuaiah siam anih tur thu leh CCTV pawh dah anih tur thu a sawi bawk.

Pu C. Lalthanmawia, SP chuan inthlanna felfai leh muanawm a awm theihna atan Police te hmalakna a sawiin Pre-Poll Arrangement siamin Police Station hrang hrang ten anmahni area huam chhungah special drive neiin lirthei kalvel enfiah hna thawh anih thu a sawi. Zu leh drugs Rs 12,66,400/- hu man tawh a nih thu a tarlang a. Inthlan vuakvet ah Silai hmanga intihthaih leh invau a awm loh nan Lunglei District chhunga Silai nei zawng zawng ten an Silai te Police Station/Police Outpost hnai ber a tung tura thuchhuah siam a nih tawh thu sawiin he thupek  hi Silai nei zawng zawng ten zawm a, an Silai te chu Police Station/Police Outpost hnai berah October thla chhung ngei hian tung vek turin Lunglei SP chuan ngenna a siam a. Strong Room pawh sipai venhimna thuahthum ah dah ani ang ati bawk.

Election Expenditure Nodal Officer Pu Benjamin Lalzama, Addl.DC chuan MLA candidate tin ten cheng nuai 20 theuh inthlanna senso atan an hman theih thu sawiin, an pawisa deposit nan hian Account thar an hawng tur in, uluk taka Account chu vawn anih thu a sawi a. Model of Conduct chungchanga Nodal Officer Pu K. Lalrohlua, Project Director, DRDA chuan Lunglei District ah MCC complaint leh bawhchiatna a la awm lova, November ni 2 atangin cVigil hmanga MCC bawhchhiatna a awm chuan report a pek theih tur thu a sawi bawk.                                                     

 Election chungchang a complaint thehlut duh te tan calling centre ah heng number 0372-2322025, 70053313255 leh 9089949646 ah te hian engtiklai pawhin a biak theih a ni. 

 

Attachment

  • Loading attachment...