Vawiin khan Excise & Narcotics Department, Mamit District chuan kumtina an tih thin angin Annual Inspection an nei a. Pu Ngurchungnunga Sailo, Commissioner, Excise & Narcotics Department chuan he hun hi a hmang a ni.

Commissioner chuan Mamit District-ah Asst. Commissioner hova Office changtlung taka kalpui a ni chu lawmawm a tih thu sawiin, ruihhlo dona kawngah tun aia nasa lehzuala hma la a, District pumpui huapa hma la zel turin thawktute a fuih. Kan hmalawka Election lo awm tur leh hunpui kan hmachhawn turah pawh mipuite'n zalen leh hlim tlang taka hun kan hman theihna turin ruihhlo, zu leh a kaihhnawih hman sualna chak zawka do a, a zuarte pawh dan anga hrem an nih theih nana inpekna thuk zawk nena an Duty-te hlenchhuak turin a fuih bawk.

He hunah hian Mamit District awptu Pu H. Lalchhuanawma, Asst. Commissioner, Excise & Narcotics pawhin thu sawiin Station mamawh hrang hrang thlen thinte Commissioner-in a tihhlawhtlinsak thin avangin lawmthu a sawi a. Mamit District chu State dang nena inthenawm anih avang leh inkalpawhna kawngte duhthu a sam loh avangin duh anga District pumpui vil a harsat thu a sawi a. Thawktute lam indaih lohna chungchang sawiin hengte avang hian District dang aia thuamthat a ngaih thu Commissioner hnenah hian a thlen a ni.

Excise & Narcotics Department chuan kan hma lawka Mizoramin inthlanpui kan hmachhawn turah ruihhlo, zu leh a kaihhnawihte nasa zawka khuahkhirh a nih dawn thu leh zu rui chunga lirthei khalh lo turin mipuite a ngen a. Hetiang tiluite chu dan anga man a, hrem an nih tur thu an sawi bawk. Mipuite'n thianghlim leh fel taka vote an thlak theuh theih nan ngawrh takin hma an la mek zel a ni.