Khuarel chhiatrupna a lo thlena Sikul naupangte himna tur atana Zirtirtute inzirna, District Disaster Management Authority buatsaih  Training of Teachers on School Safety chu vawiin khan Lunglei DC Pi Lalzarmawii, IAS chuan a hawng. 

He training DC's Conference Hall a neih Pu C Lalzuiliana, SDC leh Branch Officer, DM&R kaihhruaiah hian Pi Lalzarmawii chuan hawnna thu sawiin khuarel chhiatrupna chu engtik lai pawha thleng thei a ni a, a thlen hun tur tumahin kan hriat loh avangin a theih ang ang a ruahmanna fel nen kan in ralrin a pawimawh hle a ni a ti a, chhiatrupna thlen thulha kan in puahchahna te pawh kan inen nawn fo a, thiamna thar zawk nen kan intuaihriam reng a tul hle a ni a ti bawk.         

Vawiina School himna tur atana training ah hian Lunglei District chhunga sikul 40 atangin zirtirtute an kal khawm a, hawnna inkhawm neih zawh hian training hi neih chhunzawm nghal a ni a, Pi Chuaupari Pachuau District Organiser DM&R Lunglei chuan Sikul himna atana ruahmanna siam dan, hliam enkawl dan leh chhiatrupna a lo thlen hun atana inzir lawkna Mock Drill neih dan turte a zirtir a, Pu K. Lalsangkima Teacher Govt. High School Lunglei chuan sikul him zawk nana building sak leh a him dan ber te, sikul himna atana mamawh hrang hrangte a zirtir a, YMA Sub Hqrs. Disater Committee Lunglei atangin Pu Allan Lalremruata pawhin Hliam leh ruang zawn dan bakah chhanchhuahna hna thawh dan a taka entirin a zirtir a, Training hian ni hnih chhung a awh dawn a ni.