1273/2024-2025

2024 Vawkhniahzawn thla ni 23: Lunglei District Deputy Commissioner (Bawrhsap) thar Pu R. Lalṭhazuala chuan vawiin chhun khan a office chamber-ah Mizoram Journalists' Association (MJA) Lunglei District member-te nena inhmelhriatnana inkawm hona leh thingpui in hona a buatsaih a. Bawrhsap hi Lunglei District Information & Public Relations Officer (DIPRO) Pu C. Lalhruaitluanga chuan a ṭawiawm a ni.

Lunglei Bawrhsap Pu R. Lalṭhazuala chuan Lunglei DC atana dah a ni chu a huphurhawmna zawn awm bawk mah se, lawmawm leh phurawm a tih thu sawiin, Lunglei chu district lian, upa leh changtlung sa, missionary-te sulhnu tam tak awmna hmun a nih avangin heti ang District enkawl tura sawrkarin a dah chu a tan chona lian tak leh thil lawmawm tak nia a hriat thu a sawi a. Lunglei District hnuaia awm ṭhin Hnahthialah hun eng emaw chen a lo thawh tawh avang leh tawn hriat chhinchhiah tlak tak tak a lo tawn tawhna district a nih avangin Lungleiah chuan a intihmikhual loh thu leh hna thawhna hmun satliah anga ngai mai lo va, a khaw mi nihna thinlung pu chunga Lunglei DC hna chu thawh a tum thu sawiin, mipuite pawhin en hrang lo va, a khaw mi anga lo pawm a, ṭha taka thawhpui turin a ngen a ni.

Lunglei Bawrhsap chuan DC office chu district inpui chan chang a nih avang leh mipui tana thawk an nih angin mipui mamawh leh harsatnate a rang thei ang bera chin felsak an tum dawn tih sawiin, sawrkar thupek anga ai kal inchin fel hun lai a nih avang leh thawktu indaih lohna avang te erawh chuan eng emaw chenah mipuite hriat thiamna an mamawh dawn tih a sawi a. Kawnghmang nei leh felfai zawka hna thawh a nih theih nan thawktute hna chanpual pawh siam rem mek a nih thu sawiin, certificate hrang hrang, a bikin Tribal leh OBC Certificate pek chhuah kawngah tihsual palh a pawi theih em avangin uluk lehzuala kalpui tum a ni, tih a sawi a. Inkal pawhna kawng ṭha a awm theih nana hma lak te, chhiatna thleng chungchanga sawrkar aṭanga ṭanpuina awm thei rang taka pek chhuah te, hriselna leh zirna kaihhnawiha hma lak te, thingtlang lama bawlhhlawh thehthang leh sawngbawl dan kawnghmang nei zawk ruahman te chu a ngaih pawimawh hmasak a nih thu sawiin, Lunglei khawpui inrelbawlna chungchangah Lunglei Municipal Council (LMC)-in thuneihna leh inkaihhruaina (regulations) a neihte a nih dan tur taka kalpui a nih theih nan LMC nen thawh hona ṭha tak neih zel an tum tur thu a sawi bawk.

Lunglei Bawrhsap chuan tun lai fur ruahtui tla nasa karah veng hrang hranga inkal pawhna kawng chhia a awm leh awm loh te, chenna in chhia a awm em tih te chu Zonal Officer te'n uluk takin an vil reng tih sawiin, heti ang chhiatna thleng palh avanga ṭanpui ngai emaw, khawl leh bungraw hman tur ngaihtuah ngai emaw a awm a nih chuan tikhawtlai lova sawrkar chetna tur angah chet nghal zel tum a ni, a ti a. MJA te chu mipuite hnena sawrkar hma lakna puangzartu an nih angin District hmasawnna atan District Administration nen ṭha taka thawk tlang zel tura sawmin, District chhunga thil thleng hrang hrang chungchangah amah bengvar a, finchhuah ṭhin tur te, an ngaihmawh zawngte a hnena thlen hreh lo tur leh thurawn pe ṭhin tur te'n a sawm a ni.

He hunah hian MJA member-te hian Lunglei District leh Lunglei khawpui enkawlna kawnga an ngaih pawimawh zawng thil hrang hrang leh mipuite mamawh hrang hrang an hriatte chu Bawrhsap hi sawipuiin, hma lak ho dan tur te sawi ho a ni a. MJA Lunglei District President Pu Laltlanthanga chuan DC tharin a hun remchang hmasa berah MJA te tana hun a buatsaih chu lawmawm an tih thu sawiin, District MJA te'n DC thar an lawmna thu a sawi a. District MJA te'n DC hmasate leh sawrkar department hrang hrangte ṭha taka an lo thawhpui tawh ṭhin angin DC thar pawh chu ṭha taka thawhpui an tum thu sawiin, DC-in a mamawhna zawnah biak leh koh theih maia an inhawn tur thu a sawi bawk.