1272/2024-2025 

Aizawl 23rd July, 2024:  Vawiin khan Pi Lalrinpuii, Social Welfare & Tribal Affairs, Women & Child Development, Minister chuan Sirius leh Cresent House, Lungbial Zemabawk, Rephidim Home, Sunshine Home, Laipuitlang bakah Mizoram State Child Protection Society Office Laipuitlang ami chu tlawhin Home a awm mek naupang leh thawktute nen inkawmhona hun tha tak an hmang.

Minister chuan humsual dai naupangte chu nun bul tan tha leh tura chahin nunbul tan tha leh turin tlai luat a awm loh thu a hrilh a, nakin zelah an nun an siam that a, Pathian leh hotute thu an awih chuan ram hruaitu thlengin an la nih theih thu a sawi. Home naupangte chu an nu leh pa te chu eng dinhmunah pawh ding se, an hmusit tur a ni lo tiin naupang vanneiin sawrkar enkawlna a thlawna an dawng chu hmang tangkai a, an nun siam thatna kawnga chhawr tangkai ngei turin a chah a ni.

Sirius home hi naupang mipa kum 18 hnuailam ruihhlo lama harsatna nei enkawlna hmun niin tunah hian naupang 9 enkawl lai an awm mek a, kum 2015 atang khan naupang 179 an lo enkawl tawh a ni. Cresent House hi hmeichhe naupang kum 18 tlinglo awmna ni thungin tunah hian naupang 20 an enkawl mek a, kum 2018 atang khan hmeichhe naupang 52 te enkawlna an lo pe tawh bawk a ni. Sirius leh Cresent House-ah hian Home Superintendent hovin thawktu 17 ve ve an awm mek a ni. Rephidim Home-ah hian naupang rualban lo 25 enkawl lai mek an nei a, thawktu 17 Superintendent hovin an awm mek bawk. He home-ah hian naupang rualban lo nu leh pa enkawltu tur nei tha lo te chauh dah niin Mizoram chhunga District tin atanga dah khawmna a ni.

Minister hian Rephidim Home, Sunshine Home leh Cresent House-te hnenah hian tanpuina pawisafai a hlan nghal bawk a ni.

Sunshine Society for Children, Laipuitlang, Specialised Adoption Agency hi Kum 2008 a din niin tun thleng hian naupang ram chhunga adoption atana an pek tawh hi 140 a ni a, India ram pawnah naupang 29 adoption atan pek tawh an ni bawk a ni. Tunah hian naupang pahnih adopt theih tur an awm mek a, Superintendent hovin thawktu 11 (Aiya) an awm mek bawk a ni.

Minister hian Child Helpline (1098) Centre bakah State Adoption Resource Agency (SARA) State Project Manager Office a tlawh bakah Child Guidance Centre leh After Care (kum 18 chunglam) mi 19 awmna te a tlawh nghal bawk a ni. Home-a naupang te hi home educator te'n an zirtir bakah school-ah nitin an kal ve thin a ni.

Social Welfare Minister hi Director, WCD, Principal Programme Manager, ICPS, DCPO Aizawl, Deputy Director, WCD bakah Officials dang te'n an tawiawm a ni.