4387/2025-2026

Lunglei, 2026 Ramtuk thla ni 10: Lunglei District Bawrhsap (Deputy Commissioner) bul tuma mipuite'n sawrkar hma lakna hrang hrangte an chhawr ṭangkai theih nan an khuaa kal chilha service hrang hrang chhawp chhuahsakna, "I Kawtkaiah Sawrkar" (Prashasan Gaon Ki Ore) chu a thawh thum nan vawiin khan Lunglei RD Block chhunga Thingfal khuaah Thingfal leh a chhehvel khaw mipuite tan buatsaih a ni.

Thingfala "I Kawtkaiah Sawrkar" hun buatsaihah hian DC Office, Block Development Office, Animal Husbandry & Veterinary, Health & Family Welfare, Land Revenue & Settlement, Bank leh office hrang hrangte'n stall hawngin, awlsam zawka mipuite dawr theih turin an inpho chhuak a. Lehkha pawimawh hrang hrang siam thar/siam ṭhat tur dilna dawn leh buaipui — Aadhaar 58, MGNREGS job card 36, voter ID card 105, ST/Residential Certificate 272 leh Revenue pass 20 awmin, bank account hawng thar leh bank hnuaia sawrkar scheme hrang hranga inziak lut mi 40 an awm a. Damlo inentir mi 47 awmin, an zinga mi 29 chuan Healthy Lunglei District Campaign hnuaia LushAI Healthy Lunglei mobile application chu chhawr ṭangkaiin online appointment an la a. Ran damlo entir leh hri danna pek 57 awmin, sawrkar ruahmanna hrang hrang chungchang inzirtirna buatsaih a ni bawk a. He'ng service hrang hrang chhawp chhuahte hi mi 635 velin an chhawr ṭangkai a ni.