263/2022-2023
Lunglei the 25th April’ 2022 : Ministry of Health and Family Welfare, Govt. of India in India Independence kum 75-na lawmna 'Azadi Ka Amrit Mahotsav' puala Mizoram Block tina Health Mela (Hriselna Kutpui) buatsaih kal mekah vawiin khan National Health Mission (NHM), Health & Family Welfare Department huaihawtin Lunglei Block tan PHC Haulawngah Health Mela buatsaih a ni. Bialtu MLA Dr Vanlaltanpuia, MYC Chairman chu khuallian a ni.

MYC Chairman Dr Vanlaltanpuia chuan Haulawng PHC huam chhunga mipuiten an mamawh tak Health Mela buatsaih a ni chu lawmawm a tih thu sawiin, a ?angkai thei ang bera chhawr tum turin mipuite chu a chah a. Khawvel changkang chho zelah mahni hriselna theuh kan ngaih pawimawh a tul takzet a ni tiin kalkhawmte chu an ei leh in uluka, taksa insawizawi te ngai pawimawha zuk leh hmuam laka fihlim tura tan la theuh turin a chah a. Covid-19 hrileng avanga harsatna nasa tak kan tawh karah doctor, nurse leh medical thawktu dangte inpekna a fakawm takzet a, an thawhrimna zarah vawiin program tha tak pawh hi kan nei leh thei a ni tiin H&FW thawktu zawng zawngte chungah lawmthu a sawi bawk a ni.

Hawnna program hi Lunglei CMO Dr LC Liana'n kahruaiin Lunglei SMO Dr Lalrinthangi chuan report pe in Haulawng PHC MO Dr Lalduhawmi chuan lawmthu sawina hun a hmang.

Vawiin Health Mela ah hian District Hospital Lunglei leh Hnahthial a?angin doctor 15 rual leh thawktute, NHM leh Health Department hnuaia programme hrang hrangin clinic leh stall hrang hrang 20 an hawng a. Hengah hian mipui tana a thlawna inentirna leh counselling hrang hrang buatsaih niin, hri danna te pek a ni a. Medicine specialist, Skin specialist, Pediatrician, gynaecologist, ENT specialist te bakah Optometrist, AYUSH leh Dental doctor te telin Naupang inentirna, hmeichhe lam inentirna, Skin clinic, ENT Clinic, Cancer clinic, medicine clinic, eye clinic, dental clinic, TB Clinic, Malaria counter, NCD Clinic, Tobacco Cessation Counter, AYUSH Counter te ruahman a ni a. Hemi bakah hian Damdawi Lakna Counter pawh siam niin damdawi chi hrang hrang a thlawnin sem chhuah a ni a. IEC Counter pawh ruahman niin he counter ah hian hriselna chungchanga mipuite hriattur pawimawh information leh leaflet te pek chhuah a ni a. ICDS pawhin counter ruahman in ei tur hrisel hrang hrang, nu leh nau inenkawl dan tha te inzirtirna neih a ni. Damlote tan a thlawnin Health ID siam sak an nih bakah Health Care hnuai ah Health Insurance Card (Ayushman Bharat PMJAY Card) siam sak an ni bawk a ni.

Health Mela hi mipuiin an hlut hle a,inentir turin Haulawng leh a chhehvel mipui thahnem tak an kalkhawm a ni.