No.4608/2020-2021

Lunglei the 31st, Aug’2020: Vawiin chawhma khan Lunglei Chief Medical Officer thar Dr. Lalthlamuana hovin a office chamber-ah Lunglei MJA te nen inhmelhriatna leh inkawmhona neih a ni. He inkawmhona ah hian Dr. Lalrinthangi, SMO, Pi C.Lalremruati, DIPRO Pu Lalthangliana, Health Educator,CMO office leh Lunglei MJA-te an President Pu H.Lalthansanga hovin an tel a ni.

Dr Lalthlamuana chuan Health Department leh media mi ten thawhhona tha tak an nei chu lawmawm a tih thu sawiin H&FW Department hmalaknate thahnemngai taka an puanzar sak thin avangin an chungah lawmthu a sawi a. H&FW Department thiltumte ti hlawhtling turin Department hrang hrang leh NGO’s te, khawtlang hruaitute leh mipuite nen thawhho a hmalak tlan a tul thin a ni, a ti a. Department hmalakna hrang hrang puanzar kawngah leh Department-te finchhuah kawngah media mi te chu kawng tinrenga thawhho pui a duh thu sawiin a tha zawnga mipuite kaihruaitu leh ram hmasawn zelna tura kawng kawhhmuhtu ni zel tura tan la turin a chah a ni.

Covid-19 hrileng chungchang sawiin Lunglei District ah Covid positive enkawl na hmun Pukpui CCC ah mi 36 leh Zobawk CCC ah mi 20 chauh enkawl theih an ni a. Mi 100 enkawl theihna tur ruahman turin hma la mekin CCC Building thar sakna atan cheng nuai sawmriat panga (85 lakhs) estimate siam niin hei hi HPC Lunglei kaltlangin sawrkar hotute hnenah thehluh thuai tum anih thu a sawi a. Covid 19 nena chen ho zir a ngai dawn a, buai phili lovin sorkar dan zam social distancing, mask vuah, kut silfai, sanitizer hman te zawm theuh turin CMO chuan mipuite a chah a. Health Dept. hmalakna hrang hrang ah MJA hnathawhte an hriat reng thu sawiin, Lunglei District in hriselna kawnga hmalakna turah MJA te tawiawm turin a sawm bawk ani.

Dr. Lalrinthangi, SMO Mizoram pumpui a Malaria 40% hi Lunglei District atanga hmuhchhuah a ni a, Lunglei District a Malaria 80% hi khawthlang atanga hhmuhchhuah niin a bak 20% hi khawpui chhung atanga hmuh a ni. Kumin January atanga July chhungin Lunglei District ah Malaria vei 1887 hmuhchhuah niin vanneihthlak takin mithi an awmlo thung ani. Malaria ven kawng ah tanlak kan ngai takzet a, thosilen zar that te, DDT a inchhung kah tir te, thosi pian theina tuitling tihbo te, kan khua a sik in ASHA emaw SC emaw PHC emaw damdawiin hnai ber ah thinsen lak tir tur ani. Universal Immunization Programme ah kum 2020-21 hmalakna tarlangin 1st. Quarter 2020-21 chhungin BCG, Penta III, OPV III Measles Rubella ah hri danna 87% pek niin Intensified Mission Indradhanush 2.0 vaccine hi 2019-20 chhungin naupang kum khat hnuailam target 533 ah 547 (103%) te hnenah pek a ni. Nu naupai target 111 ah vaccine 131 (118%) pek a ni. Zenghri naupang kum 5 hnuailam mi 13478 ah 13880(103%) te hnenah vaccine pek an ni.