No.4609/2020-2021

Vawiin khan Lunglei DC Conference Hall-ah DC & DEO Pu V.Lalsangliana, IAS kaihhruaiin VC Election 2020 neih zawh tak chungchang sawiho turin Press Meet neih a ni. Press Meet-ah hian Lunglei PD& Chief Master Trainer Pu K.Lalrohlua, Addl DC Pu R. Vanrengpuia, Election Officer Pu J.Miahlung leh election Nodal Officer dangte telin Lunglei District MJA member-te an President Pu H.Lalthansanga hovin an tel a ni.

District Election Officer Pu V.Lalsangliana chuan Lunglei District chhung a Village Council inthlanna hlawhtling taka kalpui a nih thu sawiin, “ Lunglei District-ah vote 87,773 atangin vote 67,225 a tla a, hei hi za zelah 76.59 a ni a, mipuiin thlamuang takin vote hi an thlak niin kan hria,” a ti a,”Village Council inthlanna hlawhtling tak kan neih theih nana theihtawp chhuahtu Deopartment hrang hrang leh Sector Magistrate-te, Polling Officials zawng zawng, YMA, Media leh mipuite chungah lawmthu ka sawi a ni,” a ti.

State Election Commission (SEC) in ni 5.8.2020 ah Village Councils(VC)inthlanpui neih tura hriattirna a lo tihchhuah tawh angin Lunglei District ah pawh non VI scheduled district dang te rualin ni 27.8.2020 ah vote thlak a ni. Kumin Lunglei district VC inthlanpuiah hian VC constituency 113 ah seat 479(General 349 leh Reserve 130) chuh turin candidate 1418(General 1070 leh Reserve 348)an awm a. Lunglei District chu Non scheduled district zingah VC seat ngah ber district a ni.

Tun tum inthlanpui atan hian polling official thahnem tak ruat an ni a. Returning oficer tan mi 113, Presiding atan mi 133 leh PO tan mi 260, an vaiin polling official mi 506 ruat an ni. Boruak muanawm tak hnuaiah inthlan tluang taka neih a nih theih nan Sector Magistrate 15 leh Sector Police Officer 15 ruat niin VC constituency hrang hranga duty tur police personnel mi 115 ruat an ni bawk.

Inthlan tluang taka kalpui a nih theih nan District Election Officer's Offce ah Subject hrang hrang(MCC, Transport, Material, TA/DA, Postal Ballot etc.) buaipuitu tur Nodal Oficer mi 11 ruat an ni a. Team hrang hrangah leader leh supporting staff mi 100 ruat an ni bawk. Tun inthlanah hian Polling official-te hman tur lirthei chi hrang hrang 94 hman a ni.

Lunglei District-ah Vote tlak that ber na chu Vote 122 awmna khua Hlumte niin vote 121 (99.18%) a tla a. Vote tlak hniam ber na chu Vote 455 awmna khua Upper Lungrang S niin vote 159 (34.95%) a tla a ni. Lunglei district pumpuia VC Seat 479 atangin Mizo National Front MNF) in seat 237 la in , a pumpuiah seat la hnem ber an ni. Indian National Congress(INC) in seat 150 la in an dawt a, ZPM seat 42, Independent seat 43 leh BJP in seat 7 an la ve bawk. MCC bawhchhiatna liantham a awm lova, Political party hrang hrang leh candidate ten MCC an zawm tha thawhkhat hle a, an chungah DEO office chuan lawmthu a sawi.

Inthlan tluang taka zawh a nih theihna tura tha thawhtu Election official-Nodal officer te, Sector Magistrate te, polling official te, Police officer leh team hrang hranga duty-te chungah District Election Office chuan thinlung takin lawmthu a sawi a. Team hrang hranga duty tur staff phal taka hman phalsaktu Head of offices/Head of institutions/Controlling officers te chungah lawmthu a sawi bawk.