No.1164/2021-2022

Lunglei the 28^th June 2021 – Vawiin khan Lunglei District Disaster Mangement Authority (DDMA) Chairman Bawrhsap Pu Kulothungan A hovin Lunglei DC Conference Hall-ah furpui avanga chhiat rupna thleng thei laka inven dan tur leh rikrum thila hma lak dan tur hrang hrang ngaihtuahin meeting neih a ni.

Meeting-ah hian DDMA Member-te, Lunglei District  huamchhunga Disaster kaihhnawih Incident Commander-te, Fire & Emergency Services, khawtlang hruaitu aiawh leh Sub Hqrs YMA hruaitute an tel.

DDMA Chairman Pu Kulothungan A chuan khuarel chhiatna thleng thei laka lo inven leh lo inhmakhua lawk a tul thu sawiin, fur lai phei chuan fimkhur leh inralrin reng a tul a ni, a ti a. Kalkhawmte chu disaster kaihhnawiha District-a mawhphurna chelhtute an nih angin anmahni zawn theuhah uluk taka inpuahchah tur leh mipuite himna tura theihtawp chhuaha hma la tlang turin a chah a ni.

Meeting-ah hian Department hrang hrang atangin an inpuahchahna leh hmawchhawpte sawiho a ni a. H&FW Department hnen atangin fur laia natna leng thei hengte – cholera, typhoid, malaria laka District mipuite an him theihnan hmalakna kalpui mek zel anih thu report a ni a. Lunglei DCSO pawhin buhfai stock dinhmun a that tawk thu leh District chhunga Supply Centre pasarih (7) ah October thla thlenga daih tur monsoon stock a awm thu a report a. 2^ndBattalion MAP hnuaiah State Disaster Response Force (SDRF) training chhuak mi 99 awmin tun dinhmunah an zinga mi 67 chu Battalion headquarters ah an awm a. Disaster kaihhnawih bungrua hrang hrang neih mekte leh mamawhte, Quick Response Team dinhmun te, Adventure Club leh tlawmngai pawlte nena thawhho dan tur te sawiho a ni bawk.

Incident Commander-te chu an bial theuhah Hazard Vulnerability Mapping siamin building, electric ban, thingkung hlauhawm thei te leh lei min leh tui len hlauhawm te report kimchang siama July ni 10 hma ngeia report thehlut tura tih an ni a. Chhiatrupna thlen thulha mipuite him taka dah khawm theihna tur hmun (Disaster Shelter)  chu khaw tinah VCP kaltlangin building emaw hall lo identify lawk ni se tih rel a ni a. Hemi bakah hian District Disaster Mangement Authority (DDMA) whatsapp group siam nghal leh chhiat rupna laka invenna leh chetlak dan tur mipuite zirtirna ‘Awareness/ Advisory ’ pawh buatsaiha, thehdarh turin a kaihhnawih Department-te mawhphurna pek an ni bawk.