No.1673/2020-2021

Vawiin khan Lunglei DC leh District Task Force on Covid-19 Chairman ni bawk Pu V.Lalsangliana, IAS hovin Lunglei DC Conference Hall-ah Covid-19 chungchang sawiho turin Lunglei District MJA te nen Press Meet neih a ni. Press meet ah hian Lunglei DC Pu V.Lalsangliana, SP Pu Stephen Lalrinawma, CMO Dr Thani Pachuau, Medical Superintendent DR SR Ngurchamliana leh SMO Dr Lalrinthangi te an tel a ni.

Lunglei DC chuan chuan Covid-19 avanga inkharkhip kalpui tawh chinah Lunglei District hmalakna tluang taka ala kal zel thu sawiin ei leh bar lakkhawm leh sem chhuah chungchangah te, dan leh thupek kenkawh kawngah te leh VLTF-te duty na lamah te harsatna a awmlova, amaherawhchu hmun hrang hrang atanga Lunglei District mi leh sa tangkhangte an rawn thlen belh mek zel avangin kan fimkhur zual sauh a pawimawh takzet a ni, a ti. 

Lunglei District-a quarantine mek Covid-19 positive hmuhchhuah thar chungchang pawh sawiin DC chuan “Lunglei District-in Covid-19 positive case kan neih hmasak ber chu nizan khan ZMC-a Covid-19 testing laboratory ah hmuhchhuah a ni a. Covid-19 vei hmuhchhuah thar hi Delhi atanga lo haw niin 01/06/2020 (Monday) zing kar khan Lunglei alo thleng a. Patient hi tun dinhmunah khawsik chu a neilo nain hritlang leh khuh (mild case) a nei a, a dinhmun hlauhtawhnawm a ni lo. A result hriat a nih veleh hian Covid Care Centre, ETC, SIRD, Pukpui ah dah hran a, enkawl nghal niin Medical Team - Doctor leh Nurse ten 24 hours in an vil reng dawn a ni. Contact tracing pawh tih nghal niin tuna damlo ina kalkawnga a rawn chuan pui te pawh chhui chhuah vek an ni tawh a, an dinhmun hi uluk taka vil nghal a ni” a ti.

A sawi zelnaah DC chuan tuna damlo hi BCM Ramthar, Lunglei Community Quarantine Centre-ah a awm (ni thum chhung - 1^st to 3^rd June, 2020) avangin BCM Biakin compound, Ramthar hi mipui tana tlawh pawh theih loh (containment area) a siam nghal a nih thu a tarlang a. Mitinte kan fimkhur zual sauh a tul rualin mipui te chiai lo tur leh kan him tlan theihna tura sawrkarin tih tur leh tih loh tur a tih te uluk taka zawm turin a chahin Mask vuah, social distancing, uluk taka kut silfai, sanitizer hman, tul lovah mahni compound chhuahsan loh, chil chhak loh leh kaihhruaina dang te ngai pawimawha zawm theuh turin mipuite a chah nawn leh a ni. 

Lunglei SP Pu Stephen Lalrinawma chuan Covid-19 avanga inkharkhip kalpui mekah Lunglei Police ten theihtawp chhuah zelin MAP, MRP leh Home Guard atanga staff te pawh belh an nih bakah NCC, Bharat Scout & Guide leh Student Police Cadet volunteer te nen tang hovin hmalak anih thu a sawi a. The Mizoram (Containment and Prevention of Covid-19) Ordinance, 2020 kengkawh turin Police Station tinah Flying Squad din niin he Dan bawhchhia an awm em tih ngun taka check thin anih thu a tarlang. Tin, District chhunga Quarantine Centre tin te Police in uluk takin an vil reng thu Lunglei SP hian kalkhawmte a hrilh bawk.

Lunglei CMO Dr Thani Pachuau chuan Press mite zawhna chhangin tun dinhmunah Lunglei District ah khunghran mek 686 an awm a, hengte hi home quarantine 77, Sawrkar Quarantine Centre-ah mi 433 leh Community Quarantine (kohhran hall) ah mi 176 an ni a. Tin, Swab test hi 457 lak tawh niin tun dinhmunah result 82 hmuh let tawh a ni a, result pakhat a positive a ni, a ti. District mi leh sa tangkhang rawn haw belh mek zelin zaninah Mahrastra atanga lo haw mi 112 ten Lunglei an rawn thleng leh dawn a ni, a ti bawk. Tangkhang lo haw te hi Lunglei District an rawn thlenin Medical Team ten uluk taka screening lo neih pui zel niin Rapid Antibody Test (RAT) kalpui vek anih bakah Red Zone atanga lo haw te chu RT-PCR test turin Swab Sample lak thin a nih thu a sawi. Lunglei District-a Covid-19 positive hmuhchhuah thar chu a dinhmun a ngaihtuahawm lova, ZMC a phurh phei nghal tumna a awm rihlova, tuna ruahmanna siam dan chuan tuna a awmna Covid Care Centre, ETC, SIRD, Pukpuiah enkawl phawt a ni dawn a ni, a ti bawk.