Lunglei DC Conference Hall-ah vawiin chawhma khan Nehru Yuva Kendra (NYK) Lunglei hnuaia District Advisory Committee on Youth Programme (DACYP) chu Lunglei DC Pi Lalzarmawii, IAS kaihhruaiin an thukhawm a, NYK Lunglei hmalakna te thlirho in, Annual Action Plan 2016-17 an sawiho.

Pi Lalzarmawii chuan tunlaiah hna hmuh a harsa tawh a, degree neih ringawt pawn hna a hmuh theih loh avangin hna awm apiang kan thawh hreh lo a ngai a, mahni intodelh tur chuan zirlai ngawr ngawr bakah thiam thil kan neih tel a ngai a ni, a ti a. NYK hnuaia Core Programme hmang te hian thalai ten thiam thil an nei thei dawn a ni, a ti. Nehru Yuva Kendra hnuaia International Youth Exchange kaltlangin kan thalaiten ramdang te tlawh in, ram hmasawnna atana ngaihtuahna tha zawk te an rawn hawn thei dawn a ni, a ti bawk.

Pu Zomuana, District Youth Coordinator chuan presentation hmangin NYK Lunglei hmalakna te a tarlang a. Annual Action Plan sawi zauna a neih bakah nakum March 2017 thlenga an hmachhawp te a tarlang a ni.

He meeting-ah hian zawhna leh chhanna hun siam niin, member ten environmental awareness hi tun aia nasa zawka kalpui theih nise an ti a. Line department hrang hrang te nena thawh hona, convergence neih dan tur an sawiho bawk.