Science and Technology Department-in tualchher thiamna hmanga technology lam thil thar siamchhuaktu leh ngaihtuahchhuaktute tan intihsiakna a buatsaih, Indigenous Grassroot Technology & Innovation (IGTI)-a titha te hnenah vawiin khan Planning & Programme Implementation Minister Pu Lalsawta chuan Directorate of Science and Technology Conference Hall-ah lawmman a sem. He hunah hian Planning & Programme Implementation Secretary Dr. C. Vanlalramsanga chu khualzahawm a ni a. Patent Awareness Workshop neih a ni bawk. 

Khuallian chuan Mizo fate ngei tualchhuak thiamna tangkai tak tak ngaihtuah chhuaktu an awm chu lawmawm a tih thu sawiin, chutiang kawnga intihsiaknaa buatsaih chuan hun lo kal zel turah pawh mi tam zawkah phurna chawkchhuaktu a nih phah a beisei thu a sawi a. Science & Technology Department-a thawkte chuan hna an thiam thu leh an taimak thu tarlangin, Minister chuan vawiina Iawmman latute pawhin Directorate chu hmang tangkai tlang tura chah in, an thawhhona atang chuan Mizoram atanga siamchhuah ngei, ram hmasawnna atan tangkai tur, khawvel ram dang pawhin hman tlaka an pawm tur thil chherchhuak belh zel tura a beisei thu a sawi a ni. 

Minister Pu Lalsawta chuan thil siam sa atanga a nihna dik tak leh a hman tangkai theihna (application) hmuh chhuah tur tam tak a la awm teuh thu leh, Science leh Technology hmanga an tangkaina khawrh chhuah theih a nih thu te te sawiin, chutiang hmuchhuak tur chuan ram dang mithiamte kuta dah mai lo turin kalkhawmte chu a chah a. Vawiina Iawmman dawngtute zawng zawng chu phur taka bei chhunzawm zel tur leh, hemi kawngah hian Sorkar pawhin a theih ang tawk tawk chu tih a inhuam thu a sawi bawk. 

Khualzahawm Dr. C. Vanlalramsanga chuan tunlai khawvelin a ngaih pawimawh em em chu hmasawnna huapzau leh hawl kim a nih thu sawiin, science leh technology lamah pawh a lagsar leh thil titheite kutchhuak chauh nilo, grassroot level thleng a huap chuan mipui tam zawkin hmasawnna an chhawr phah tur thu a sawi a. IGTI chu chumi kawnga Mizoramin ke a pen na hmasa a nih thu sawiin, mi tam zawkin an ngaihtuahna tangkai tak tak te a tak a chan theih nan leh, khawvel huap market-ah pawh an kutchhuak chu hmelhriat a nih ve theih nan tha thlah lova Science and Technology Department nen chuan thawkho zel turin kalkhawmte chu a chah a ni. 

Vawiin hun hi Dr. R.K. Lallianthanga, Chief Scientific Officer, Directorate of Science and Technology chuan kaihruaiin, Pu Samuel Lalmalsawma, Senior Scientific Officer chuan intihsiakna kalpui a nih dan tlangpui report a pe a. IGTI intihsiaknaa judge-te aiawhin Pu Lalmuanawma, Industrial Training Institute Principal chuan thu a sawi bawk. 

IGTI Competition hi Mizoram Science, Technology & Innovation Council, Directorate of Science & Technology chuan hetiang lam tuimi te zawn chhuah a, theih anga tanpui a, patent file kawngah leh a siamchhuahna kawngah te puih an nih theih nan buatsaih a ni a. Competition a tel tur hian patent la file loh na chauh tel phal a ni. September ni 1, 2016 atang khan intihsiakna chungchang hian chanchinbu, local cable leh social media platform hrang hrang kaltlangin advertisement chhuah a ni a. Intihsiakna hi district wise leh state level-a buatsaih niin, category pahnih -  Prototype category (Technology lama thil thar siamchhuaktute inelna) leh Idea category (Technology thar ngaihtuahchhuaktute inelna) siam a ni. Prototype Category ah hian a vawiin entry 12 awm in, Idea Category ah entry 8 a awm a. District-wise inelnaah hian Prototype Category-ah lawmman hi pakhatna Rs. 15,000; pahnihna Rs. 10,000. Pathumna Rs. 5,000 pek niin, Idea Category-ah pakhatna in Rs. 5,000, pahnihna in Rs. 3,000 leh pathumna in Rs. 2,000 an dawng a. hian State Level inelna hi Prototype category bikah neih niin lawmman chu pakhatna Rs. 50,000, pahnihna Rs. 25,000 leh pathumna Rs. 12,000 siam a ni bawk. Lawmman dawng ve lo te tan participation prize Rs. 1,000 theuhsiama ni bawk. 

Category hrang hranga lawmman dawngtute chu a hnuai ami ang hi a ni: 

1. State Level Competition Result: