Vawiin khan Lunglei DC Pu Ashish Madhaorao More, IAS hovin Lunglei District chhunga Bank hrang hrang hnathawh dan thlirhona leh hmalak zel dan turte sawihovin DC Conference Hall-ah District Consultative Committee/District Level Review Committee leh District Level Security Committee Meeting nei a ni.

Vawiin meeting-ah hian Lunglei District chhunga heng Bank 6 - State Bank of India, AXIS Bank, Canara Bank, HDFC Bank , IDBI Bank leh Mizoram Rural Bank aiawhte bakah Mizoram sorkar hnuaia Department hrang hrang officials te an tel kim hle a; he Committee in a ruahman tawh sa ‘Annual Credit Plan 2013-2014’ chhunga an hnathawh leh hmalakna te thlirho niin kum 2014-2015 chhunga ACP Target pawh sawiho a ni. Bank tinin CD Ratio, Priority Sector Advance, Agricultural Advance, SHG Credit Linkage, Kissan Credit Cash (KCC), PMEGP & SJRSY, Housing Loan leh Educational Loan te an pekchhuah zat bakah tun hnaia rampum huapa ‘PM Jan Dhan Yojana’ hnuaia hmalak tawhna leh hmalak zelna turte sawiho a ni.

Vawiin meeting-ah hian rampumah Sorkar Laipuiin NREGA Job Card-te chu Identity Card anga pawm tur a tih laiin Bank thenkhatten an pawm duh lo thin chu sawichhuah a ni a, hei hi DC Pu Ashish More chuan ngaimawh hlein tun chinah chuan Job Card hi Danin a phal angin Identity Card-ah Bank tin ten an pawm tur a ni tiin a hrilh a. Bank lam thung chuan Lunglei District chhunga PMEGP hnuaia loan hmututen an rulh that duh loh avangin harsatna nasa tak an tawh thu an sawi chhuak a, hemi chungchang hi DC chuan a tul anga hmalakpui a intiam a ni. PM Jan Dhan Yojana hnuaiah hian a bik takin heichhiate ngai pawimawh an nih thu leh District hmun kilkhawr zawkahte mobile connectivity tihchangtlun dan tur te sawiho a ni bawk a. Bank tinin an himna (bank security) ngai pawimawh theuha security guard, alarm system, CCTV leh smoke detector nei theuh thei se tih Meeting-ah hian rel a ni bawk.