Nimin chawhnu khan Pu C. Ngunlianchunga, AH&Vety Minister chuan Champhai-ah Vety Department hnuaia NLUP vawk vulh thlangtute hnenah 2nd phase 2nd instalment a sem.

He semchhuah programme Dr. Lalchungnunga Pudaite, DVO Champhai kaihhruaiah hian Khuallian Pu C.Ngunlianchunga AH&Vety Minister chuan NLUP lo sem tawh ah pawisaa sem tawh a ni a, dawngtu thenkhatin thil dangah an hman thin avangin Sawrkarin ruahmanna thar siamin vawk ngeia sem a nih thu a sawi a. NLUP sem hmasakah vawk note tam tak a thih chungchangah phat a tum loh thu leh an tih dik loh chu a pawm thu a sawi a, vawk thi te chu sem that theih a nih tawh loh thu a sawi bawk. NLUP Implementing Board-in vawk note hrisel ngei sem a nih theih nan hma lain khawchhak vawk te PRSS an vei em tih enfiah a nih hnuah beneficiaries-te hnena vawk note hrisel leh him an sem thei chu lawmawm a tih thusawiin, dawngtu te chu ramdanga thawnchhuah thama vulh pung tura theihtawp chhuah leh rim taka thawk turin a chah a, NLUP hi thuthluanga dawn chi a ni lo a, rim taka beka thlantui luanga thawh chi a ni a, rim taka thawkte chuan hlawhtlinna an hmuh thin thu a sawi bawk. Pu C.Ngunlianchunga chuan, Chamul khawlchhia siamthatna turin Rs Nuai 27 hmuh tawh a nih thu leh AH&VEty Office thuamtha tura hmalakna a kal mek thu a sawi bawk.

Vety Department hnuaia NLUP vawk vulh thlangtute hnenah 2nd phase 2nd instalment hi beneficiaries chhungkaw 81 te hnenah vawk 6 theuha sem a ni a, hei bakah hian damdawi leina tur Rs 3,000 sem a ni bawk a. Semchhuah anih atanga ni 7 hnuah vawk hri dan hmanga jection leh tur a ni a. Heng bakah hian vawk in sakna tur leh a chaw sem leh a ni dawn bawk a ni.

Dr. Esther Lalzoliani pawhin technical report pein vawk natna PRRS vanga khawchhak vawk lakluh khap a lo nih tawh avangin tunah pawh hian NLUP vawk sem te pawh hi Elisa Antibody Test kit hmanga endik vek an nih hnuah vawk hrisel leh PRRS vei lo vek a ni tih finfiah anih hnuah semchhuah tura ruahman an nih thu a sawi.