Mizorama an in din tirh atanga kum 31 an tlin, ‘31st Bank Day’ chu Mizoram Rural Bank (MRB) chuan nimin khan New Secretariat Complex, Khatla a ATI Auditorium-ah lawmna an buatsaiha, Chief Minister Pu Lal Thanhawla’n a hmanpui. Chief Minister hian lawmna hun a hmanpui hma hian New Secretariat Complex a sorkarin hmun a peknaah Head Office sakna tur lungphum a phum hmasa a ni.

Chief Minister chuan MRB in kum 31 na hmel a hmu chu a lawmpui thu a sawi a. Ramin hma a sawn dawn chuan thingtlang mite chawikan hmasak a tul tih sawiin, loneimi, kuthnathawktute hmasawnna tur kawngah MRB hi an pawimawh hle a ni a ti a. Mizorama Bank te hi an Credit Deposit ratio a hniam bik tih tarlangin, tipung tura a ngen thin thu Pu Hawla chuan a sawi a. MRB C:D Ratio hi chu a ziaawm pawl a ni tiin, an indin tirh atanga MRB tum chu thingtlang mi ten anmahni kaltlanga an hmasawnna atana hmalak a ni a ti a, loneimi kuthnathawkte dinhmun hrethiama tanpui theihna apiangah hmala turin a ngen nawn a. Hei hian thingtlang leh khawpui inkar zau ta lutuk pawh a tih ziaawm ngei a beiseiawm a ni a ti.

MRB in New Secretariat Complex-a Head Office an nei dawn ta chu a lawmpui thu a sawi a, Mizoram mipuite ten hamthatna anih ngei a duhthu a sawi a. Bank ten a mamawhte tana a thlawna an pekna Corporate Social Responsibility (CSR) chu MRB hian a hmang tha bera a hriat thu a sawi bawk a ni.

Chief Minister hian plaque pawt pharhin MRB Branch 76-na tur Thuampui Branch a hawng bawk a. CSR atanga MRB in Lunglei YMA Sub Hqrs leh Champhai YMA Sub Hqrs hnenah Ambulance an pek pawh Chief Minister hian motor chabi (token) YMA hruaitute hnenah a hlan bawk a ni.

Mizorama MRB Branch tin ten sum harsat avanga school kal theilote a sponsor thin a, kumin 2014 thleng hian naupang 394 an sponsor tawh a, vawiin hian matrica titha bik an sponsor school naupang 7 hnenah lawpuina thilpek an buatsaih chu Pi Lal Riliani’n a hlan bawk a ni.

Khualzahawm Pu S.K.Magoo, Chief General Manager, SBI, Local Head Office, Guwahati chuan MRB hlawhtlinna chhan pawimawh tak pakhat chu a dawrtute vang a ni a ti a, branch tinte chu inelna thianghlim an neih reng thu a sawi bawk. Branch Manager titha bik hnenah lawmpuina pawisa fai a hlan bawk a ni.

MRB hian kum 31 a tlin danchhenin Sihhmuia Bethani Children’s Home hnenah TV lian leh Alu bag an pe bawk.

MRB hi Regional Rural Bank Act, 1976 hmanga kum 1983, September 27 khan din a ni a. Branch zawng zawng hi Core Banking Solution hmanga thlun zawm vek an ni a, India rama khawi bank ah pawh pawisa transfer theih a ni. Tunah hian branch 76 an awm tawh a, kum 2013 - 2014 chhung khan hlawkna (hlep) Rs.24.78 Crore an hmu a ni. MRB hi SBI Sponsor a ni a, Chairman pawh hi central sorkarin Sponsor Bank (SBI) atanga a ruat thin a ni.