Ni thum chhung awh, Reiek Tourist Resort-a Tourism Department buatsaih Anthurium Festival chu nimin khan a tiak. Anthurium Festival ni 3-na leh a tawpna ni hi Tourism Minister Pu John Rotluangliana chuan khuallian niin a hmanpui a, Parliamentary Secretary – Lt. Col. (Rtd.) ZS Zuala leh Pu T T Zothansanga te pawh nimin programme ah khan an tel bawk a ni. Anthurium Festival tawpna ni programme hi Pu Lalnghinglova, Secretary, Tourism Department chuan a kaihruai a ni.

Pu John Rotluangliana chuan Anthurium Festival hi tu ta bik mah anih loh thusawiin he Kut hi Mizorama cheng zawng zawngte ta a ni a, Kut hmang hian Mizorama chengte inkara inuanau tha leh insuihkhawmna tha zawk a thlen ngei ka beisei a ni, a ti. Tourism Minister chuan Anthurium Festival hi ram chhung leh ram pawn khualzin miten hriain hmang turin rawn zin ve se tia a duhthu sawiin khualzin te tlawh tamna state ah te chuan a hlawkna teltu chu tualchhung mite an ni fo thin a ni, a ti. Sawrkar chuan hun lokal zel turah Anthurium Festival hi a buatsaih zel dawn a, chung ah te chuan mipui tawiawmna leh phurpuina a ngen.

Anthurium Festival hi Tourism Department huaihawtin kum 2006 atanga hman tan a ni a, kuminah pawh item hmuhnawm leh benglut tak tak bakah, mipuite tana intihhlimna hrang hrang buatsaih a ni a, kuthnathawkte leh thil hrang hrang zuartu ten dawr (stall) hrang hrang sawmnga chuang an hawng bawk a ni.