Vawiin chawhnu khan Lunglei DC Pi k. Lalrinzuali, District Disaster Management Authority (DDMA) Chairman ni bawk kaihhruaiin Lunglei DC Conference Hall-ah Lunglei DDMA chu District chhunga chhiat tawhna thleng mekte sawiho tur leh chhiatrupna la thleng zel thei laka Lunglei District inpuahchahna thlirho turin an thukhawm. He hunah hian a kaihhnawih sawrkar official-te bakah tlawmngai pawl hruaitute an tel.

DDMA Chairman Lunglei DC Pi K. Lalrinzuali chuan tun hnai fur ruahsur leh thli tleh avanga chhiatna thleng te pawi a tih thu sawiin chhiat tawk chhungkuate a tawrhpui takzet thu a tarlang. Chhanchhuah leh chhawmdawl hna kalpui kawngah Department-te, khawtlang hruaitu leh NGO te inpekna leh thawhrimna ropui a tih thu a sawi bawk.

Meeting-ah hian kalkhawmte atangin report ngaihthlak niin Lunglei District huamchhunga khuarel chhiatna thlenna hmun Tlabung leh a chhehvel khua te, Zotlang, College Veng Lunglei, Hnahthial leh hmun dangah te hmalak zel dan tur an sawiho a. Zotlang, Lunglei a lei tlahniam chu hun lo kal zel turah chhiatna lian tham thleng thei anih avangin Zotlang khawtlang hruaitute leh helai hmuna ram neitute nen inrawnin hmalak vat ni se tih Committee chuan a rel a. Khawthlangtuipui chu kum tin a len thin tak avangin lui hnaih lutuk a cheng te pawh sawn chhuah dan ngaihtuah zui ni se tih Committee chuan a rel bawk.