Vawiin khan state NHM team te'n Champhai District Hospital tlawhin Supportive Supervision an nei a. NHM team-ah hian   Dr. Lily Chhakchhuak, State Programme Officer, RCH  Staff  leh UNICEF aiawh consultant-te an tel a ni.

NHM Team hian District Hospitala nau neihna leh naupiang hlim enkawlnate chu tlawhin, Staff Nurse te'n record an siam dan leh naupiang hlim an enkawl dante an enfiah a. Hmasawn an ngaihnate hrilhhriat niin Doctor leh Nurse te pawhin NHM Team te hnenah hian harsatna  an tawh mek leh an mamawh langsar zualte an lo thlen a ni.

Endikna hian a ngaihpawimawh ber chu Champhai District Hospital a Sick New Born Care Unit (SNCU) bul tan mek  enkawl zel dan tur chungchang a ni a. SNCU hi nausen pianghlim dam lo enkawlna tura ruahman niin, a  bikin Champhai District Hospital leh Damdawi In hmundanga nau piang dam lo leh harsatna neite enkawlna tur a duan a ni. SNCU ah hian nausen pianghlim kg 2.5 tling lo te enkawlna ngaihpawimawh zual niin, tun dinhmunah Champhai District Hospital-a  Sick New Born Care Unit-ah hian nausen damlo 79 lai admit a enkawl tawh a ni a, heng nausen admit tawh atang hian kg 2.5 tling lo te ngaihpawimawh zual an ni. Nausen damlo thenkhatte hi phototherapy hmanga hem thin an ni a, Damdawi In a Paediatric Doctor leh SNCU Staff Nurse te'n a enkawl dan tur dik leh kalphung fel taka enkawl a pawimawh thu he hunah hian tarlan niin, SNCU hi mipui ten a pawimawhna an hre tharin, nausen damlo tam zawk ten an chhawr tangkai chho mek ni a tarlan a ni bawk. NHM Team-te hmuhdan chuan   Neonatal Jaundice (naute eng) a tam hle a, hemi chungchangah hian nu in hnute tui a neih that theih nan ei leh in tha an dawn a pawimawh em em a, Nu ten midangte sawi awih mai lova, Doctor mithiamte ngei rawn thin a pawimawh takzet a, Nu in naute a piantirh a hnute ngawrh taka pek hi a tihmakmawh a niin a pawimawh hle tih thu te NHM te hnen atang hian ngaihthlak a ni.

Heng bakah hian Nauneihna Room (Labour Room) vawnfel, vawn thianghlim leh tihchangtlunna LaQshya chungchang pawh team-te hian an endik nghal a. India ram pumah Damdawi In a nau neihna tihchangtlun leh tihhmasawnna lam Ministry of Health & Family Welfare hian ngaipawimawh chho hle in, hemi kawngah hian NHM hnuaiah Mizoram pawhin District Hospital zawng zawngah hma a la mek a, hemi kawngah hian Nu in rilru hahdam leh zangkhai taka nau a neih chhunga enkawlna a dawnna tur (Respectful Maternity Care) ngaihpawimawh bik a ni a. Mizoram chhunga District Hospital-ah  te State leh National Certification hmu  turin  Assessment a khat tawka neih reng a pawimawh a, Champhai District Hospital hian State leh National Certify ni turin kawng engkimah theih tawp an chhuah mek thu tarlan a ni bawk.

Nau neihna hmun leh enkawlna hmunte enfiah a nih hnu hian chawhnu lamah Dr. R. Lalawmpuia, CMO kaihhruaina in Activities Review leh Orientation hun hman nghal niin, SPO-RCH leh CMO leh DMS ten programme sawihawnna an nei a. Technical session neih chhunzawm a ni a,  UNICEF atanga Resource Person Pu R.Lalmuankima, Consultant, Pu Pankaj Kumar, Regional Coordinator, Norht East; Dr. Biakthansangi, Paediatrician te'n Hospital Staff kalkhawmte hmaah  Power Point   presentation hmangin zirtirna an pe a ni. He programme-ah hian CMO, District Medical Superintendent, SMO leh Damdawi In Staff-te an tel  kimin hlawkthlak an ti hle a ni.