Nimin tlai khan District Level Screening Committee (DLSC) Chairman leh Lunglei DC ni bawk Pi K.Lalrinzuali kaihhruaiin dan lova khaw din/khaw per chungchang ngaihtuah tura Committee din DLSC on Unauthorized Settlement chu Lunglei DC Conference Hall-ah an thukhawm. He thutkhawmna ah hian Tlabung Sub Division haumchhunaga dan lova khaw din/khaw per chungchang sawiho niin Lunglei Additional DC Pu R. Vanrengpuia, CMO Dr Thani Pachuau, SDO(S) Pu Lalnundika, DLAO Pu J. Miahlung, Tlabung SDO (C) Pu Henry C.Lalrawnkima leh official dangte bakah Sub Hqrs YMA President Pu Lalrotluanga leh Tlabung Sub Division hnuaia VC engemawzat an tel.

Meeting kaihruaitu Lunglei DC Pi K.Lalrinzuali chuan hmasawnna hna chak zawka kalpui tur leh khua leh tuite inlungrual taka kan awm zel theih nan Dan lova khaw din/khaw per (Unauthorised Settlement) chungchang chin fel a pawimawh takzet a ni, a ti a. Hemi kawnga thahnemngai taka hma la tu sawrkar official-te, YMA, MSU, MZP hruaitute leh khawtlang hruaitute chungah lawmthu sawiin thawhho pui chhunzawm ah a sawm a. DLSC on Unauthorized Settlement in a tum ber chu India khua leh tui, Dan ang taka an awmna tur hmuna awm ten hamthatna an dawn theihna tura hmalakna a ni, a ti bawk.

Meeting-ah hian Tlabung SDO (C)Pu Henry C.Lalrawnkima kaihhruaina hnuaia siam ‘Joint Inspection Team on Unauthorized Settlements in Tlabung Sub Division’ report chu pharh niin zirho a ni a. He report-ah hian Tlabung Sub Division huamchhunga Dan lova khaw din/khaw per te chungchang – an history leh an dinhmun chipchiar taka ziah lan niin hmalak tul te tarlan a ni a. Committee chuan he Inspection Report hnuaia recommendations-te chu sawrkar hotute hnenah thlen vat ni se tih a rel a ni.