Lunglei District Standing Committee chu vawiin khan Lunglei D.C. leh DEO ni bawk Pu V. Sapchhunga hovin election chungchanga hriattur thil pawimawh hrang hrang leh Lunglei District chhunga inthlan awm tur atana hmalakna hrang hrang sawihovin DC’s Office Chamber-ah an thukhawm a ni.
Committee kaihruaitu Lunglei Bawrhsap Pu V. Sapchhunga chuan kumin Mizoram inthlan turah kumdanga tih ngaih loh thil thar tam tak a awm thu sawiin Election Commission chuan inthlan huna candidate leh political party ten uchuak lutuka sum an sen thin chu khuahkhirh an tum vang a ni ber tih Committee member te a hrilhfiah a. Mizoramah chuan Candidate tinte chu election senso atan a tam berah cheng nuai 8 phalsak a ni a, hei hi Bank Account hrang hlaka dahin nomination an file ni atangin inthlanna atana an senso apiang chu nitin Expenditure Monitoring Cell hnenah an thehluh zel a ngai dawn a ni tih a sawi a. Election Commission of India-in a rawn ruat tur Expenditure Observer hnuaia thawk vek tur an nih avangin Election Notification a chhuah ni atangin election zawhfel hma chu Election Observer-te pawh Mizoram-ah an cham tur thu a sawi bawk.
Lunglei DC chuan a sawizelnaah inthlanna boruak tichhe zawnga chetna te, sum leh pai leh thildang hmanga inthamna te, invauna leh ralthuam/hriamhrei cheleknate reng reng awm lo tura hmalak a ni a, sum leh pai leh thildang hmanga vote lei leh inthamna chi reng reng chu, a petu leh a dawngtu angkhat rengin hrem theih a nih thu Committee a hrilh bawk a. Hetianga sum leh pai chelekna leh invauna/inrikrapna leh thil duhawmlo thleng apiangte chu District Election Officer hnenah a rang thei anga thehluh a nih theih nan Complaint Monitoring & Call Centre-ah englai pawhin heng Telephone Nos. ah te hian telephone hmang pawhin complaint thehluh theih a ni : 0372-2322025 (toll free from landline) leh 0372-2324121, a ti bawk. Hei bakah uchuak taka Candidate mimal fakna emaw Candidate dang sawiselna emaw ang chi thuthehdarh chu khap a nih thu sawiin Pu V.Sapchhunga chuan Electronice leh print Media-ah news emaw advertisement chhuah tur reng reng chuan Media Certification & Media Monitoring Cell-ah phalna lak hmasak a ngaih thu a tarlang bawk a ni.
Vawiin tlai vek dar 3:00PM khan Mizoram CEO Pu Ashwini Kumar hovin Mizoram District zawng zawng D.C. te chu Video Conferencing an nei zui a, hetah hian Lunglei D.C. hovin Election Officer Pu Mark Lalthanliana leh officials dangten Lunglei NIC Video Conferencing Room atangin an tel ve a ni. District zawng zawngah dan leh thupek kengkawh tu tur security lama hmalak zel dan tur te, polling station tina hmalak tulna te leh Election Oberver-te an lo kal huna lo tawiawm dan chungchangte an sawiho a ni.
Election Commission of India chuan nimin tlaiah khan Mizoram Legislative Assembly inthlan neih hun tur a ruahman thar chu hetiang hi a ni :
Date of Notification : 1st November 2013
Last Date of filing of Nomination : 8th November 2013
Date of Scrutiny : 9th November 2013
Last Date for Withdrawal : 11th November 2013
Date of Polling : 25th November 2013
Date of Counting : 9th Dcember 2013
