Vawiin khan Lunglei DC Conference Hall-ah Lunglei District Level Green Mizoram Committee te chuan an Chairman Lunglei DC Dr Ankita Chakravarty kaihhruaina hnuaiah kan hmalawk Dt 11.6.2018 a Green Mizoram Day, 2018 lo thleng tur hman dan tur an rel.

Lunglei Bawrhsap Dr Ankita Chakravarty chuan khawvel changkang chho zelah leilung hausakna, thing leh mau te kan tichereu nasa hle a, chuvangin ram kan tihchhiat leh hemi avanga boruak, sik leh sa danglam nasa lutuk veng leh siamtha leh turin mawhphurna kan nei theuh a ni, a ti. Green Mizoram Day, 2018 hlawhtling leh urhsun taka hman a ni theih nan District Level Green Mizoram Committee member-te an theihtawp chhuah theuh turin a chah.

Lunglei District Level Green Mizoram Committee Member Secretary DFO Dr Vidhyasagar, IFS chuan programme kalpui dan tur leh kawng hrang hranga an inbuatsaihna sawi hawnna hun a hmang a. Kumin Green Mizoram Day hi 11th June, 2018 ah hman a ni dawn a. A hawnna programme hi Chawngbawla Hall, Pukpuiah chawhma dar 11:00-ah neih ni se tih committee chuan a rel a. Lunglei East Assembly Constituency bialtu MLA leh MYC Chairman ni bawk Pu Joseph Lalhimpuia chu khuallian a ni ang. Inkhawm zawh hian kalkhawmte insemdarhin HATIM Campus, DIET Campus, Eklavya Model Residential School Campus, Jawahar Navodaya Vidyalaya Campus leh NIELIT Campus ah te thing phun hnatlang neih a ni ang. Hemi bakah hian Lunglei to Aizawl kawngpui (World Bank Road) dunga thing phun tawh te enkawl zui (maintenance) hna thawh ni se tih rel a ni a. Kum danga tih thin angin kumin ah pawh Department/NGO mahni thingphun enkawl kawnga hma la tha thlanchhuah leh ni se tih a ni a, heng planting agency ti tha thlanchhuah te hi Inaugural Function-ah Citation pek an ni ang.

Green Mizoram Day, 2018 pual hian DFO Office chuan chawlhkar khat chhung (11th – 15th  June, 2018) thing tiak phun tur an sem chhuak dawn a. Environment and Forest Department complex, Bazar Vengah hemi hun chhung hian a duh te tan lak theih a ni ang.

Meeting-ah hian District Level Committee member te an kal tha hle a ni.