Vawiin khan ATI (Administrative Training Institute)  Conference Hall-ah ni thum awh tur Cyber Crime Awareness programme Mizoram Police hnuaia CID (Crime) leh PHQ Training Branch tangkawp buatsaih hawnna hun neih a ni a. Home Minsiter Pu R. Lalzirliana chu Khuallian niin Home Principal Secretary Pu Lalnunmawia Chuaungo chu Khualzahawm a ni.

Khuallian Pu R. Lalzirliana chuan khawvel thang zelah mihring nunphung ti zangkhai thei turin thil hrang hrang hmuhchhuah a ni zel a, chumi zinga kan chhawr tangkai em em pakhat chu internet hi a ni tiin kalna apiangah internet connection a awm a, keimahni mobile phone thlengin internet kan hmang thei ta a ni, a ti a. Tangkai hle mahse fimkhur a ngai a, hmansual emaw hman fimkur loh chuan min vaw let thei tam tak keng teltu a ni, a ti a. Minister chuan cyber crime chu hacking, identity theft, piracy, social media hmansual te thlengin a ni a, mi zawng zawng hi cyber crime tuartu kan ni thei a ni tih kan hriat a ngai a, social media khawvela kan luh hnu hian a hluar lehzual a, facebook, whatsapp, twitter leh a dangte kaltlanga thu dengkhawg tak tak inthawn hi a tuartu in an tawrh dan a zirin hrem theih an ni, a ti a. Hmeichhe zahawmna tichhe thei zawng te, intih hmingchhiat tumna te, invauna tawngkam hman te, mi duh loh chung tilui tura nawra thu bakah thlalak social media a tarlan te hi dan hmangin hrem theih vek an ni tiin thil sual dang titute nen ang khata en tur an ni, a ti. Internet kaltlangin inbumna hrang hrang a thleng thin a, mahni inlum ngei atang pawhin che sual kan awm ta fo a, pawisa lama inbumna bank account number leh lottery man chungchang thlengin inbum nan misual ten an hmang a ni, a ti a. Heng sualna hrang hrang te hi IT Act 2000 hmangin hrem theih an nih thu sawiin cyber crime hmachhawn tura inpeih a ngaih thu a sawi a. Programme hlawhtling tak neih a nih theih nan duhsakna a hlan nghal bawk a ni.

Khualzahawm Pu Lalnunmawia Chuaungo cuan thu sawiin Cyber crime hi Information Technology (IT) ken tel a ni a, IT   a inthlak a, a danglam ang zelin cyber crime pawh a inthlak a ni, a ti a. Cyber Crime Awareness programme hi a pawimawh rualin a hnuah kan inzirzui peih a ngai a ni, a ti a. Cyber Crime tam tak a awm a, heng hi mipuiin kan hriat zau zawk theih nan inhrilhhriatna neih a pawimawh hle a ni tiin thil sual a ni tih hre lova lo ti sual a awm theih tlat a ni, a ti.

Sawrkar laipuia Cyber Crime Prevention against Women and Children hnuaia hmalakna a ni a, Cyber Crime Awareness hi vawi li neih tura duan a ni a. Batch hmasa ber hi Dy SP atanga SP, supervisory officer te tan buatsaih niin hemi zawhah hian investigating officer te tan training buatsaih a ni leh ang. Computer leh a kaihhnawih inhmelhriattirna te, internet leh social media chugchanga buaina chinfel dan te, Cyber crime leh a kaihhnawih te, atm card leh bank account chungchanga buaina thleng thei te, IPC section Cyber Crime lama pawimawh lai te leh case study thlengin zirtirna neih tura ruahman ani a. SBI, ICT, Social Welfare, CID (Crime) leh Police Headquarter aiawhten an zirtir dawn a ni.  Kum 2014 khan CID (Crime) hnuaiah Cyber Cell din a ni a, tunah hian Cyber Police Station a hlangkai turin hmalak mek a ni. Sawrkar laipui atangin nuai 148 hmuh niin Cyber Forensic Laboratory leh Cyber Training Centre din turin hmalak mek a ni bawk.

Programme hi IGP Pu L.H. Shanliana, IPS chuan kaihruaiin kalkhawmte lawmna thu a sawi a. CID (Crime) SP Pu Zosangliana chuan Awareness programme kalphung a tarlang a. Home Minister leh Principal Secretary te hi memento hlanna hun neih a ni a. CID (Crime) Addl. SP Pu Stephen Lalrinawma chuan lawmthu sawina in hun a khar a ni. Addl SP rank police officer 4, Dy SP rank officer 19 an tel a ni.