Nizan khan Lal Thanhawla Auditorium-ah Information & Public Relations(I&PR) Department leh Mizoram Film Forum(MFF) te tangkawp chuan Mr.Bond Entertainment te siam 'Olivia' Film tlangzarhna hun an buatsaih. Olivia Film tlangzarhtu, I&PR Director Pu David L Thangliana,MIS chuan tunah hian Mizoram sawrkarin phur takin Mizoramah Film siam leh a kaihhnawih lemchan lama tumite tih hmasawn nan ruahmanna a siam mek a, sawrkar budget-ah Film Development pualin sum te dah a tawh a ni a ti. 

I&PR Director Pu David L Thangliana chuan, "Social media in khawvel a run meka, Mizoramah pawh chhungtinte buaipui a ni mek a; hetih laia Mizo lemchanthiam ten Social Media chungchangah zirtirna tha tak,  Olivia Film hmanga an rawn chang chhuak hi a remhriat thlak hle a; he film in a zirtir tha tak tak te leh lemchan khawvela Mizo thalaite hmasawnna te hi Mizo mipui tam thei ang berin hmuhsak tum ila a lawmawm hle ang", a ti. Sawrkarin thlaite khawvel thar a siamsakna kalzelah Lemchan huangah pawh thalaite rualawhna hriain tan a la mek a; tuhnai atang khan kumtin, Nodal Department, I&PR hnenah Film Development atan Cheng Nuai sawmhnih a dah tawh bakah infrastructure, training, film exposure tour, skill development leh lemchan tih hmasawnna tura thil tuldang atana hman turin  Cheng Nuai Zatel a sanction leh tawh bawk a ni. Film siamna Equipment - Camera, slide, drone, lightings, go-pro leh a dangte pawh sawrkarin a lei anga chu chu film siam lama tui te tan Nodal Department - I&PR hnen atanga hawh theih a ni thuai dawn a ni a ti. 

Sawrkarin Ailawng khuaah India hmarchhak biala a hmasa ber turin  Film City din turin hma a la tan mek tih a sawi a. Film City chu film maker-te tana tangkai tura ruahman a ni anga, khualzinmite hipna hmanrua a ni tel ang. North Eastern Council(NEC) pawhin Mizoram sawrkar hmalakna chu a phurpui hle a; tunhnaiah an Secretary leh official te an rawn zin tum khan NEC bul tuma Film Festival, Mizoramah neih dan tur chungchang pawh rilru inhmu takin sawihoa,  remtih a ni tawh a ni a ti.  Pu David-a chuan Mizo ten kan  film siamtute kutchhuak te leh keini aia kum 20, kum 30 laia lemchan khawvela harh hmasa zawk Manipur te bakah Sap leh Vai film te hial te nena khaikhinna mit nen kan en thin chu  a dik tawk lo a ni a ti a. "Mizo film siamtu te hian a kum telin hma an sawn a. Eizawnna atana hmang lo, zirlaite leh a remchang ten, film chan pawh zir hmasa leh training pawh nei hmasa hawt loa an chan a ni tih kan hriattlan a tha in ka hria.  An hmasawnna hi step by step a ni a, vawi leh khatah hmasawn duak duak lo mahse an kutchhuakte hian belhchian a dawl tawh hle a ni. Sawrkar hmalakna Film Development huangah hian Mizo thlai a tui te zawng zawng an leng a. Chutih rual chuan Mizo thalaite rilru tibuaitu leh an thlenchin ti thui lo tu chu, Music Video, feature or short film emaw audio 'hit' pakhat neih vanga  'Milar', a saptawngin 'Celebrity' anga inngaihna leh an khawsak phung buai phah nana hman a ni. Cable TV channel pakhata lar hi Mizoram pumin kan hmelhriat lem loa, Milar nih hi mahni inhriatna lam ni loin midangten min hriatnaah a innghat zawk a, kan lemchanthiamte leh Show Business a inhnamhnawihte paw'n hlawhtlin leh zual an duh chuan inngaitlawm taka an khawsak phung leh an eizawnna te chhunzawm zel huphurh phah nan hmang loin an tihturte an tih chhoh zel a pawimawh ber a ni", a ti. 

Thusawitu dang, MFF President Pu Lalawmpuia Khiangte chuan Mizo Film in hma a sawn theih nan Mizo mipui ten an hlutsak chu thil pawimawh hmasa ber a ni a; chu mi hnuah Mizo Film chuan than lam a pan zel ang a ti. Mizo Film Industry chu la naupang tak, a sum zawng phei chuan hlawkna sawi tham awmlo, mi thahnem ngai leh tuimi ten mahni sum senga an kalpui a ni a. Mizo film in hma a sawn dawn chuan Mizo mipuite, consumer  phur tak an nih hmasak a ngai a; film entu mai ni loin Mizo Film hmasawn zel na turin Mizo mipuite chu Film Critics an nih a, film siamtute thurawn petu an nih a ngai tel a ni a ti. MFF chuan sawrkar nen thawkhoin  Film Certification an buaipui mek tih a sawi a; mahni mimala film siam, tlawmngai pawlte leh kohhran thalaite pawh Film in a target group dik tak ten film an en theih nan Certification paltlang dah pawimawh hmasa turin a ngen lawk a ni a ti a. Film Certification peihfel a nih hnuah  Central Board of Film Certification (CBFC), Censor Board kan tih mai hnuaia kalpui  mek, India film rating  - U (Unrestricted Public Exhibition), U/A (Parental Guidance for children below the age of 12 years), A (Restricted to adults) leh  S (Restricted to any special class of persons) ang te pawh siam hran a ngai tawhin a hriat a, thisenchhuahna, tharum thawhna te leh naupang kumtling lo te en tura mawilo thil leh tawngkam awmna te pawh thlitfim tum a ni a ti. 

Mr.Bond Entertainment neitu leh Olivia Film siamtu(producer) Pu Zothanpuia Sailo chuan Olivia Film chu Mizo thalai Film siam lama tui te Ziah, Direct leh channa, a scripts te a lo en hnuah thawpui tlaka a hriat avanga produce sak a ni tih a sawi a. "He film-ah hian Mizo ram mipui tam zawk Mobile phone hum mek te tan thil tihawm tih tur leh tihawmloh tihloh tur te chenin zirtirna thatak a awmah kan ngai a. Mizo mipui ten min hlutsak ngei kan beisei a ni" a ti. Olivia Film-ah hian Actor, supporting actor leh chanvo nei tlem zawk, side actor an tih ang zawng zawng nen mi 30 chuang an awm a; he film changtute zinga tam zawk chu Pachhunga University College zirlaite an ni.