Nimin (5.6.2018) chawhnu khan Chief Minister Pu Lal Thanhawla chuan Mamit Fire Station, District Research Officer thuthmun leh District Panchayat Resource Centre te chu hawngin, Mamit Chhimveng Hall-ah Joint Inaugural Function buatsaih chu khuallian niin a hmanpui bawk. Transport Minister Pu John Rotluangliana chu khualzahawm a ni a. Chief Minister hi Cooperation Minister Pi Vanlalawmpuii Chawngthu leh Hachhek bialtu MLA Pu Lalrinmawia Ralte, Political Adviser to CM te'n an tawiawm a ni.

Chief Minister Pu Lal Thanhawla chuan Mamitah department pawimawh tak tak building thar kan hawng thei hi a lawmawm tak zet a ni tiin, ram kang leh in kangte thelhna tur kawnga hmasawnna rahbi pawimawh takte zinga mi F&E Station changtlung tak awm ta te, state economy dinhmun chhutna atana tangkai tak District Research Office leh VC te training--na tur DPRC building, khawtlang inrelbawlna in hma a sawn phah zelna tur Mamit District in a nei chu nih avangin lawmawm a ti a. Hmasawn belhchhah zel tura tanna petu a nih a beisei thu a sawi. Chief Minister chuan Mizoram chu India ramah Gross domestic product (GSDP) pung nasa ber state palite zinga mi a nih thu te, kumin sawrkar kum kal mek a GSDP thanna chu Finance Ministry in double digit ni tura an rin thu te, Mizoram kum khat sum lakluh chawhrual Per Capita Income pawh India Per Capita Income aiin a san zawk thu te a tarlang a. Hengte hi kan ramah remna leh muana a awm avang leh kan ram economy dinhmun siam that nan a sorkarin NLUP leh thalaite hmakhua ngaia an tan eizawnna kawng tha hawng tura NEDP sorkarin a kalpui mek vang a nih tel thu a sawi a. Hmasawn zel tur chuan rinawmna vawng chunga tanrual a pawimawh thu a sawi bawk.

Khualzahawm Minister Pu John Rotluangliana chuan sawrkar hmalakna zarah hmasawnna ruangam tam tak Mamit District-ah hmuh tur a awm chho zel thu sawiin, a ruala mipui tana tangkai leh pawimawh em em tur sawrkar building pathum hawn a ni ta chu lawmawm a ti a. Mipui pawhin lawm nachang hre tura a duh thu sawiin, chutihrual chuan hmang tangkaitu leh dimdawi taka neitu thinlung pu vek tura  duh thu a sawi a ni.

Mamit Fire Station-cum-Quarters hi cheng nuai 180 seng a 2.9.2015 a sak tan niin, 20.4.2017 khan zawh a ni a. Metre 661.62 bial a zaua sak niin, chhawng thum a awm a. Type-III quarter pahnih leh Type-IV quarter pakhat a awm a ni. A sak hna hi Mizoram PWD in thawkin, 25.1.2018 khan Fire & Emergency Services Department kutah a hlan a ni.

Economics & Statistics Department hnuaia Office of the District Research Officer hawn thar hi a sak hna thawktu AIE Constructions te nen June 2016 ah contract agreement ziakin hma an la nghal a. Office building hi chhawng 4 a sak niin, Conference Hall leh chowkidar quarter a tel a ni. Metre 530 bial a zai niin, a vaiin cheng nuai 60 senga sak zawh a ni. Economics & Statistics Department hian kum 2016 khan Mamit ah hian Research Officer in a enkawl turin District Office ah siam tan a ni.

SIRD&PR in District VC Inpui, District Panchayat Resource Centre an sak chu Ministry of Panchayati Raj atanga sum hmuh hmanga cheng nuai 144.4 senga sak a ni a. 1.10.2016 khan sak tan niin, 8.2.2018 khan zawh a ni. Metre 685 bial a zau hmun awhin, mi 80 thut lenna Auditorium leh mi 40 thut theihna Conference Hall, Library, mi 30 dawl zo Guest Room, Head Faculty Room leh Establishment Room bakah Kitchen leh mi 30 lenna Dining Room te a tel a ni.

He programme-ah hian Chief Minister leh Amah tawiawmtu Pi Lal Riliani, ISTH (Mizoram Chapter) President chuan World Environment Day puala Mamit District Painting Competition buatsaih a tithate hnenah lawmman an hlan nghal a ni. Painting Competition-ah hian inelna thupui chu "Beat Plastic Pollution" tih niin, zirlai Middle School section leh High School Section ah inelna hi then niin, section pahnih a titha zual pathum thlanchhuah ve ve te chu lawmpuina thuziak leh pawisafai pek an ni.

Nimina Joint Inaugural Function neih tak hi Mamit DC Pu Bupesh Chaudhary chuan a kaihruai a. Heng Office hawn tak Technical Report-te hi Er. Lalmuankima Henry, Chief Engineer, Buildings, PWD; Pu Lalchhuanawma Hrahsel, Director Eco & Statistics Department leh Er. C. Lal Thlansanga, Assistant Engineer, SIRD&PR te chuan an pe a. Programme hi Pu J. Hrangdailova, Mamit Joint VC Chairman chuan lawmthu sawiin hun a khar a ni.