Vawiin khan Economic & Statistics Conference Hall-ah NEDP-EDS (Entrepreneurship Development Scheme) hnuaia Entrepreneurs’ Exposure trip (ni ruk chhung) a kal turte vailiamna hun hman a ni a. He trip hi EDS enkawl tura din Mizoram State Entrepreneurship Development Monitoring Committee (MEDMOC) ruahman niin Kolkata khawpuia Industrial Centre hrang hrang an tlawh dawn a ni. He hunah hian Planning Department Principal Adviser cum Addl. Secretary Pu Saihlira, Deputy Adviser-cum-Deputy Secretary Dr. Lalrinchhana, Deputy Adviser-cum-Deputy Secretary Pu B. Lalrintluanga leh Planning Department hnathawkte an tel a ni.

Principal Adviser cum Addl. Secretary Pu Saihlira chuan thu sawiin NEDP hnuaiah ram hmasawnna atan chak taka hmalak a ni, a ti a. NEDP Committee peng hrang hrang leh an hnathawhte a tarlang a. Kan ram hian hma a sawn dawn chuan sumdawnna lamin hma a sawn ngei ngei a ngai a ni, a ti a. Chutiang ang hmasawnna zir tur chuan trip in nei dawn a, midangin hma an lak dan hrang hrang thahnemngai taka zir turin a fuih a. Trip hlawhtling tak an neih theih nan duhsakna a hlan nghal a ni.

He hun hi Planning Deputy Adviser-cum-Deputy Secretary Dr. Lalrinchhana chuan a kaihruai a. Project Coordinator EDS Cell Pu Lalrinnunga chuan EDS hnathawhte sawi zauna hun presentation hmangin a nei a. Planning Deputy Adviser-cum-Deputy Secretary Pu B. Lalrintluanga chuan thusawina hun a nei a. Exposure trip a kal tur te hi Pu B. Lalrintluanga leh EDS Cell Project Assistant Pi Saidingpuii Sailo telin mi 23 an ni a. Heng entrepreneur 21 te hi District hrang hrang atanga thlanchhuah an ni.