Lunglawn Lungleia leimin nasa takin Pu Vanlalpeka in (chhawng hnih pucca building – cement concrete) chu nizan dar 7 rik hma deuh khan a hnawl a, a building hi a chhe hneh hle. He inah hian chhungkaw pahnih an cheng a. VCP Lunglawn hnen atanga chhiatna thlen thu hriat a nih veleh District Disaster Response Force te a hmunah an kal nghal a; YMA, Sports and Youth Services, Lunglei District Adventure Club, State Disaster Response Force leh 1^st Battalion Assam Rifles ten chhanchhuah hna hi a rang thei ang berin an thawk nghal a ni.

MLA pahnih Pu Joseph Lalhimpuia leh Pu Chalrosanga Ralte te bakah Lunglei Bawrhsap Dr Ankita Chakravarty, Lunglei SP Pu C. Lalthanmawia leh official dangte a hmunah an kal nghal a. Zan dar 8 rik hma khan mi pali chhanchhuah an ni a, Civil Hospital ah tlanpui nghal niin an zinga pakhat ke ruh tliak  tih loh chu hliam na lutuk tuar an awm lo. Leimin hian mi 10 a la delh avangin mihring nung dam awm leh awm loh enna khawl Life Detector hman nghal a ni a, he Life Detector hian mihring nungdama awm a hmu theilo a. Search and rescue operation hi ngawrh taka chhunzawm zel niin zan dar 10:20 khan ruang hmasa ber lakchhuah a ni. Chhanchhuah hna hi zan khuaa thawh a nih hnuah vawiin (05/06/2018) chawhma dar 11 khan zawh fel a ni. Vanduaithlak takin he chhiat tawhna rapthlak takah hian mi 10 an thi a ni.

Lunglei DC Dr Ankita Chakravarty, IAS chuan chhiat tawk chhungkuate a tawrhpui takzet thu sawiin Deputy Commissioner Office, Lunglei chuan State Disaster Response Fund hnuaiah zangnadawmna leh tanpuina awm thei ang ang an buaipui sak thuai tur thu a tarlang.