No.1292/2020-2020

Lunglei the 22nd, May’2020: Nimin khan Lunglei District Task Force on Covid-19, Lunglei khawpui chhunga kohhran hrang hrang hruaitute leh Village Level Task Force te chuan Lunglei DC Conference Hall-ah meeting neiin kohhran Hall-te Community Quarantine Centre-a hman chungchanga inkaihhruaina leh inbuatsaihna te sawihona an nei. Meeting-ah hian Lunglei DC Pu V.Lalsangliana, SP Pu Stephen Lalrinawma. CMO Dr Thani Pachuau leh official dangte leh kohhran hrang hrang hruaitute leh VLTF-te an tel a ni.

Chairman Pu V. Lalsangliana chuan Lunglei a kohhran hrang hrang ten sorkar ngenna chhangin an kohhran Hall te tangkhang lo hawte khunghranna “Community Quarantine Centre” atana hman an phal avangin an chungah lawmthu a sawi a. Covid-19 hripui leng mek avanga State danga tangkhangte lo haw runpui kalpui chhoh mekah hnunhma neih ten lo haw turte dah hranna tur a dawl zawh meuh rih loh avangin Kohhranho te puihna leh tawiawmna an mamawh thu a sawi a ni.

Lunglei khawchhung kohhran 20 te Community Quarantine Centre atana inhuam awmin hemi bawhzui hian 18th May, 2020 (Monday) khan Lunglei District Level Task Force on Covid-19 te chu group pali (4) ah inthenin heng kohhran-te hi an tlawh kual a, an hmunhma leh facility neih te anlo endik tawh a. He hmalakna kal zelah hian nimin meeting chuan kohhran Hall te sorkar in inkaihruaina an siam anga inbuatsaihna te, hnathawktu te, eitur siam te, security te , Medical leh bawlhlawh chungchang a an hmalak dan te sawiho niin harsatna an neih te arang lama District Administration emaw mahni veng viltu tur officer te hriattir tur a tih ani.

Community Quarantine Centre hrang hrang ah Police duty pakhat theuh dah an nih tur thu sawi a ni bawk. Community Quarantine Centre a tangkhang lo haw khunghran tur te hi a bul hnai a awm ten sorkar dan zam Mask vuah leh social distancing zawm chuan covid 19 kai a hlauhawmloh thu zirtir tur in kohhran hruaitute leh VLTF-te chu chah an ni. Mizoram pawn atanga tangkhang lo hawtur in report mi 960 an awm a, heng zinga mi 546 te chu lo sawrkarin ruahmanna a siam tluang taka kalpui anih chuan hun reilote ah lo thleng mai tura beisei an ni.