No.1291/2020-2020

Lunglei District mi leh sa tangkhangte’n tluang takin Lunglei an rawn thlen belh zel a. Hmarchhak state hrang hrang atang leh Tamil Nadu leh Pondicherry atanga mi engemawzat an rawn haw hnuin nizan khan West Bengal, Assam leh Nagaland atanga lo haw mi 11 (mipa – 4 leh hmeichhia -7) an rawn thlen belh leh. Aizawl atangin MST Bus a rawn phurh phei niin Quarantine Facility DIET, Melte zan dar 9:50 ah an rawn thleng a ni.

Tangkhang rawn haw te hi District administration, Doctor leh police ten Quarantine Facility-ah anlo hmuak a. An lo thlen hian an chanchin kimchang lo chhinchhiah a, rapid antibody test (RAT) kit hmanga an hriselna dinhmun lo enfiah zel niin, chumi hnuah quarantine facility-ah dah luh nghal zel an ni a. RAT hmanga enfiahnaah hian rinhlelhawm an awm lo. Mi pakhat Home Quarantine a dil angin phalsak a ni a, a dang mi 10 te hi DIET Girls’ Hostel Quarantine Facility-ah dah an ni a. An awmnaah hian an hman tur mattress, blanket, thleng leh utensils dang, sahbawn, toiletry items leh mamawh dang lo ruahman lawk sak an ni. Quarantine Facility-a dah luh te hi mahni room chhuahsan lo tur leh faina leh thianghlimna kawnga fimkhur taka awm tur hriattir niin mimal thil (towel, samkhuih, cell phone, plate, sahbawn, thawmhnaw etc) in hman tawm miahlo tura hriattir an ni bawk.

Hetih lai hian vawiin thleng khan haw runpui thawh khatnaa hmarchhak state atanga lo haw Lunglei District mi leh sa mi 125 khung hrante chu anmahni khung hran hun bi a kim tawh avang leh RAT hmanga test nawn lehnaah anmahniah harsatna sawi tur a awm loh avangin quarantine facility atanga chhuahtir an ni tawh a. An chhuah hnuah pawh mahni in lamah ni 14 chhung la inkhung hran chhunzawm tur leh fimkhur taka an hriselna dinhmun thlithlai reng tura chah nghal an ni.

Tun dinmhmunah Lunglei District-ah Quarantine Facility-a khung hran mek mi 72 an awm a ni.