Lunglei DC Pi Lalzarmawii, IAS kaihhruaiin District Level Organising Committee chuan nimin khan Lunglei DC Conference Hall-ah January ni 14, 2017-a Kuthnathawktute Ni hman dan tur an rel.

Pi Lalzarmawii chuan sawrkarin kuthnathawktute a ngaipawimawh a, chuvang chuan kum 2011 atang khan an puala Kuthnathawktute Ni hman thin a ni, a ti a. Kan ram mipui tam zawk te kuthnathawka eizawng an nih avangin kan ram hnuk pawimawh tak an ni, a ti.

Meeting-ah hian Kuthnathawktute Ni chu Lunglei khawpuiah chuan Lunglei Convention Centre-ah hman nise tiin an rel a. Khuallian chungchangah erawh NLUP Implementing Board (NIB) thutlukna ngaihchan nise an ti a ni. Kuthnathawh chawisang zawnga inzirtirna neih leh NLUP hnuaia hma la tha te chawimawina hun hman nise an ti a. Beneficiary hlawhtling te an hlawhtlin dan chanchin tawi sawina hun pek nise, hun hlimawm leh hlawk thlak tak hman nise tiin an rel bawk.

Nimin vek khan Lunglei DC Pi Lalzarmawii, IAS kaihhruaiin a pisaah Lunglei District chhunga Sub-Division leh Block Level-a Kuthnathawktute Ni hman dan tur an rel a. Mizoram hmun hrang hrangah rual khai zawka hman a nih theih nan NIB meeting chuan hemi Ni hman dan tur kaihhruaina a lo siam tawh a, Lunglei District chhungah pawh NIB kaihhruaina zulzuia hman tha an tih thu an sawi a ni.

Lunglei District-ah chuan Lunglei, W. Bunghmun, Hnahthial, Haulawng, Lungsen leh Thingsai ah te Kuthnathawktute Ni hman a ni ang.