2309/2022-2023
Lunglei the 14th October, 2022 - Lunglei khawpui tana bawlhhlawh sawngbawlna hmun tura ruahman mek Solid Waste Management Centre, Riangvai Thlanmual thlang ami chu nimin khan Lunglei DC & Chairman, Lunglei Sanitation Task Force Pu Kulothungan A hovin a hmunah enfiah a ni.

Inspection-ah hian Lunglei DUDO Pi Vanthangpuii leh UD&PA Department thawktu dangte bakah helai hna thawktu contractor Risor Associate Service, Zarkawt aiawhte an tel a ni.

Lungleia Solid Waste Management Centre ruahman na tur hian Ministry of Development of North Eastern Region (DoNER) hnuaia Non-Lapsable Central Pool of Resources (NLCPR) kaltlangin cheng Nuai 600 project hmuh a ni a. Hmalakna thawh khatna atan hian Rs. 1,44,60,900/- (cheng nuai za leh sawmli pali, sing ruk leh zakua) hmuh niin hemi atang hian a hmunhma thenfai leh siam rem (jungle clearance), barbed wire fencing, gate, Sanitary platform for dry waste leh Resource Management Centre te ruahman a ni ang.

Hnathawh hi bultan mek tawh niin a thawktuten a hmunah an awm chilh mek tawh a ni.

Lunglei DC & Chairman, Lunglei Sanitation Task Force Pu Kulothungan A chuan Solid Waste Management Centre chu Lunglei khawpui thang chho mek atan ruhrel pawimawh berte zing ami ani tiin UD&PA Department hotute leh contractor-te chu an hna fimkhur leh uluk taka thawk turin a hrilh a. Harsatna an neihte Lunglei Sanitation Task Force ah thlen thuai thin turin a chah bawk a ni.