Vawiin khan Tipperaghat  Tlabung ah District Agriculture Office, Lunglei buatsaihin Thlasik Buh (Winter Paddy) seng programme leh Fall Army Worm (Tun lai vaimim eichhe tu Pangang) chungchang a inzirtirna hman ani a. He hunah hian Lunglei DC Pi K.Lalrinzuali chu khuallian niin, Pu H.Lalthansanga, MJA Lunglei Sub-Hqrs President chu khualzahawm a ni.

Lunglei DC Pi K.Lalrinzuali chuan kuthnathawktute hmakhua ngaia Agriculture Department-in programme tha tak mai kum khata buh vawi 2 (hnih) tharchhuah inzirtirna an kalpui chu ropui a tih thu leh kuthnathawktute tana hmasawnna nasa tak a thlen ngei a rin thu a sawi a. Tipperaghat leh a chhehvelah kumtin buh vawihnih an leilet a an seng thin hi Mizoram  hmun dang leilet neitu te pawhin entawn ve se a tih thu sawiin  mizo ten kan ei ber Buh a intodelh kan tum anih chuan Fur (Kharif) leh Thlasik (Rabi) a buh chin hi nasa zawk a kan kalpui a pawimawh hle a ni, a ti. Tipperaghat leh a chhehvel khua ten hetiang anga buh tum hnih an seng thei hi an fakawm in entawn tlak hle a ni s ti bawk.

Pu H.Lalthansanga President MJA Sub Hqtr in Zoram hmun hrang hrang a leilet, tui lak tur nei tha ten, thlasik ah an leilet dah awl mai mai lovin, thlasik buh han ching ve ta se tun ai hian buh thar pawh a pung zual tur a ni a, entawntlak te entawn hrehlo ila hei hi hmasawnna rahbi pawimawh tak pakhat anih thu a sawi.

He Programme hi Pu Tlangtimawia Zote, DAO,Lunglei in a kaihruaia, Rev.Lalmuanzuala Sailo Tlabung BCM Pator Bial vawngtu in hunserh a hmanga, Pu C. Malsawmkima SDAO, Tlabung in Technical Report pein Tlabung Sub-Division huam chhungah hian kum 2017-2018 chhungin 1760 MT buh thar chhuah a ni a, kum 2018-2019 chhung hian khaw 6 (ruk) ah loneitu mi  685 in an leilet ah buh tum 2 (hnih) an thar tur thu an report.

Hemi zawh hian Dr.David Fangzauva,AFO in tunlai Mizoram chhunga kan buaipui em em vaimim eichhetu 'Fall Army Worm' laka kan thlai venhim dan tur chungchang zirtirna a pe nghal bawk a, lo neitu kal khawmten hlawk thlak an ti hle. He Programme ah hian Tlabung YMA Zaipawl in hla an rem a,Tlabung Zodin Branch YMA leh YCA,Tipperaghat ten cultural lam an entir bawk.

Pu Ngurrinsanga Sailo SDAO (Hqtr)in Vote of thanks a sawi hnuah Chairman in hetiang Programme hman a ni hi Pathian malsawmna a ni a, he hun hi Agriculture Minister leh Director (CH) te hriatpuina a hman a nih thu sawiin Programme khar a ni.