Vawiin khan khawvel hmung dangte rualin Lunglei Districta a vawikhatna atan Lunglei Agriculture Conference Hall - ah  World Pulses Day lawmna hun hman a ni. Lunglei DC Pu V Lalsangliana, IAS chuan khuallian niin a hmanpui. World Pulses Day 2020 lawmna programme ah hian Agriculture Department leh sawrkar Department dang hnathawkte, Lunglei MJA hruaitute, kuthnathawktute leh sawm bik dangte an tel.

Hawnna inkhawm Lunglei DAO Pu Tlangtimawia Zote kaihhruaiah Lunglei DC chuan kalkhawmte World Pulses Day 2020 chibai bukin, khawvel pum huap pawha Ni pawimawh Be ei pawimawh inzirtirna World Pulses Day puala Lunglei District-ah programme buatsaih a ni chu lawmawm a tih thu a sawi a. World Pulses Day chu United Nations General Assembly hmalaknaa hman tan a nih thu sawiin he Ni ina a tum ber chu be chi hrang hrang (chickpeas, dry beans, lentils, dry peas leh lupins)-te mihring hriselna atana an thatna te inzirtir leh ei uar inzirtir a ni, a ti a. Nikum February 10,2019 atang khan khawvel pum huapa hman tan a nih thu a tarlang bawk. A sawi zelnaah Lunglei DC chuan hmasawnna tluantling leh daih rei nei tur chuan mihring hriselna a pawimawh hmasa a ni tiin Mizo te zingah pawh kan Sa ei uar lutuk kan kalsana thlai leh be hrisel tak tak te ei uar kan inzirtir a tul a ni, a ti a.  Kan ramah mihring hirselna a that chuan kan economy pawh a tha zawngin thui takin a nghawng dawn a ni tiin World Pulses Day 2020 pualin pulses ei ngai pawimawh leh uar sauh turin mipuite a sawm a ni.

Lunglei MJA President Pu H.Lalthansanga pawhin thu sawiin Pu Ngurrinsanga Sailo, SDAO, Lunglei in lawmthu sawina hun a hmang bawk.

World Pulses Day 2020 lawmna hi chawhnu lamah neih chhunzawm niin Pi Baby Lalremkimi, AEO Lungle in “Report on Pulses Cultivation within Lunglei District” tih thupui hmangin report a pe a. Tin, Pi Lalmalsawmi, Nutritionist, ICDS Lunglei-in mihring hriselna atana pulse a pawimawhna zirtirna a pe bawk a ni.