Vawiin hian National Deworming Day, 2020 hawnna hun Anganwadi Centre 1, New Serchhipah hman a ni a, Dr. Lalzirmawia Chhangte, IAS, District Bawrhsap chuan khuallian niin he hun hi a hmanpui.

Bawrhsap chuan thusawiin, sawrkar hian mipuite hriselna a ngaipawimawh hle a, hmalakna pawh a ngah hle a ni, chung zinga pawimawh tak pakhat chu rulhut pai te enkawl hi niin Deworming Day chu kumtin kalpui reng a ni, a ti a. Ei tha tinreng ei mah ila, Rulhut kan pai tlat si chuan kan taksa tan kan thil ei te chuan hna a thawk tha tawk thin lova, kan taksa thanlenna kawngah harsatna a lo awm phah thei a ni, a ti a. Ei tur thianghlim leh hrisel chauh ei ila, kan ei dawn ah pawh fai takin kut sil fai thin ila, Rulhut kan kaina tura lakah min vengtu tha tak a ni, a ti bawk. Bawrhsap hian District chhunga naupang leh tleirawl Rulhut hlo ei thei tur chin zawng zawng te chu damdawi hi lo ei vek turin a chah a ni

Dr. Laldawngliana Sailo, CMO Serchhip chuan he hun hi a kaihruaia, National Deworming Day hi kum kalta lamah pawh lo neih tawh thin niin, kumin ah pawh February thla leh August thlaah neih anih leh tur thu a sawi a. Naupang kum 1 atang kum 19 inkar te chu ei tir vek tur niin, Anganwadi Centre zawng zawngah leh Primary School atanga Higher Secondary School zirlai te ei tir vek tur anih thu a sawi a ni.

He hunah hian Pu Lalbiakthanga, CDPO Serchhip, Pu Vanlalchhana, SDEO Serchhip, Dr. Lalhlunpuii leh thawktu dangte an tel a ni.