Vawiin khan ramchhung hmundangte rualin National Deworming Day chu Jawahar Novodaya Vidyalaya (JNV) School ah hman a ni a. Dr Lalrozama District Bawrhsap chuan khuallian niin a hmanpui.

Dr Lalrozama chuan Sawrkar laipui chuan mipuite'n hriselna tluantling an neih chu a ngai pawimawh hle a, kan taksa tichhetu rulhut chu kan do a tul zia leh kan taksa hriselna kan ngaih pawimawh a tul thu sawiin, pawnlam thianghlimna bakah kan ei leh in thianghlim taka kan sawngbawl a tul a, inthiarna hmun diktaka kan in thiar loh chuan rulhut thehdarhtu kan ni thei a ni tiin, Ekinah chauh inthiar turin kalkhawm naupangte a chah a ni.

Rulhut chuan kan taksa-ah harsatna chi hrang hrang min thlen a, thluak thlengin a khawih pawi thei a ni. Rulhut kan pai chuan ei tur hrisel kan taksa tana kan lakluhte a nih tur anga a thawh hmain kan pum chhungah alo ei chhe thin a. Chu chuan nghawng thalo tam tak min thlen a ni a ti. Rulhuthlo (Albendazole) chu a khat tawka kan ei fo thin a tul thu a sawi bawk.

Dr Lalmuanawma Jongte, Senior Medical Officer, Mamit pawhin Power point presentation hmangin Mamit District chhunga, Rulhut do beihpui thlakna tur hrang hrang a tarlang a. He damdawi hi naupang kum 1 atanga Tleirawl kum 19 te hnena pek tur niin Naupang 1-5 te hi Anganwadi Centre(AWC) kaltlang pek an ni anga, kum 6-19 te hi School leh College ah eitir an ni bawk dawn a ni. Kumin 2020 National Deworming Day pual hian Govt School naupang- 10377, Private School-9084, AWC -7454, Pre-School - 50 leh Anganwadi Centre a hming la ziaklo naupang - 333, Kum 6-19 Zirna chawlhsan tawh mi - 724 leh College zirlai naupang - 261, an vaiin mi 28283 te hnenah pek tum an ni. Kum 2019 National Deworming Day puala naupang rulhuthlo pek beihpui thlakna, hlawhtling taka kalpui a lo ni tawh a. Kum 1-19 inkar naupang mi 30324 te hnenah Albendazole pek an lo ni tawh a ni.

Vawiin National Deworming Day hi Dr Vanlalfela, Chief Medical Officer chuan a kaihruaia, JNV school naupang thlanchhuahte bakah School thawktute leh Officials- te khuallian kaihruaina-in rulhuthlo (Albendazole) a hmunah hian ei nghal a ni. Pu Vanlalsailova, Addl DPC SSA chuan lawmthu sawina a nei bawk

He hunah hian District Hospital-a thawktute, Social Welfare bakah Pu Paul Rokima, DIPRO, Mamit te an tel a ni.