Kangmei Ven Hapta “Fire Prevention Week 2020” hawnna inkhawm chu vawiin khan Vana Pa Hall-ah State Level Fire Prevention Committee bultuma buatsaih a ni a. Home Minister Pu Lalchamliana’n khuallian niin he hunah hi a hmanpui a, kumin Fire Prevention Week hi February 10 atanga 15 chhung neih tur niin thupuiah “Kangmei chhuak tur veng la, i ram chhan rawh” tih chu thlan a ni.

Khuallian Pu Lalchamliana chuan kangmei chhuak tur ven a pawimawhzia leh ramngaw humhalh a pawimawhzia hi hrechiang tawh viau in inhre mah ila kan inzirtir nawn a kan inhrilhriat that reng a tul a ni a ti a, mei hi thunun a nih loh chuan kangmeiah a lo chang thin a, mihringte mai bakah nungcha leh thlai, ramngaw, sik leh sa thlengin nasa takin kan tawrh phahin chhiatna rapthlak tak a thleng thin a ni a ti. Home Minister chuan kangmei hi kan fimkhur tawk loh vang leh kan inthlahdah vanga lo chhuak a nih fo thin avangin, kan lo fimkhur zual leh theihnan hun bik nei a inzirtir pawh hi a pawimawh hle a ni a ti a. Sawrkarin theihtawp chhuah mahsela tlangram lo neih kan la bansan hleithei si lova, kum tin lo hal kan la ngai zel si nen lo hal turte chuan meilam sial uluk ila, sawrkar thu awihin khua a ro lehzual hun nghak kher lovin lo hal hun chhung ruahman hi zawm theuh ang u tiin lo haltute a chah a ni. Hei bakah hian khawtlang leh tlawmngai pawl hrang hrang ten tan la a kangmei veng tura an thawk chhuak thin chu a thlamuanthlak a ni tiin kohhran inkhawmah te pawh kangmei ven pawimawhzia hi inzirtir zel theihn nise a duh thu a sawi a ni. Home Minister chuan Mizoramah Fire station 14 a awm thu leh district thar pathumah Fire Station neih tuma hmalak tan mek a nih thu sawiin Fire Station huamchhunga awm ten kangmei chhuah leh rikrum thilah helpline number 101 a hrilh thin tur leh hmundang a awm tan Police Emergency Response Support System (ERSS) number 112 a hrilh thuai thin turin mipuite a ngen a ni.

Inkhawm kaihruaitu Environment, Forests & Climate Change Minister Pu TJ Lalnuntluanga pawhin Kangmei Ven Hapta hman chhungin mipuite hnenah ram kang leh kangmei hrang hrang laka him inzirtir uar lehzual tum a ni a ti a, sawrkar laipui leh Mizoram sawrkar pawhin kangmei ven chungchang hi a vein a ngaipawimawh em em a, 12th Finance Commission in ram kang ven nan leh ramngaw humhalh na sum tam zawk sen a tul thu a sawi a, a hnu a Finance commission thar in din apiangin ngaihpawimawh a hlawh ziah thin a ni a ti a. Ramngaw humhalhna tura dan in thuneihna hrang hrang a pek te a nihna ang taka kenkawh a nih theihnan nasa lehzualin hma kan la dawn a ni a ti a. Boruak tha leh hrisel, sik leh sa nuam, lei tha leh ramngaw tha, nungchate zalenna tur nei turin Forest Department chauhin a ti thei lova, mipuite nen kan tanho a ngai a, kan mawhphurhna theuh a ni tih kan hriatchian a pawimawh a ni a ti.

Mizoram sawrkar chuan lo hal tur zawng zawngte chuan March ni 15, 2020 hma a hal vek turin a hriattir a, Lengpui Airport leh a chhehvela lo hal turte chuan tlailam dar 3:30 hnu lamah chauh hal turin a hriattir bawk a ni.

Kumin hian District leh Khaw hrang hrang zingah kangmei ven kawnga thawk tha lawmman siam a ni dawn a, District leh Khaw kangmei veng tha lawmman pakhatna in Rs. 50,000/- leh citation, pahnihna in Rs. 30,000/- leh citation, pathumna in Rs. 20,000/- leh citation an dawng dawn a ni.