Vawiin chawhma khan HPC Lunglei leh NGO Coordination Committee tangkawp buatsaihin Convention Centre-ah Mizoram University Southern Campus lawmna programme ropui taka hman a ni. He hunah hian Higher and Technical Education Minister Dr R. Lalthangliana chu khuallian niin Agriculture Minister Pu C. Lalrinsanga chu khualzahawm a ni. Lunglei HPC Vice Chairman Pu Lawmawma Tochhawng, Lunglei South bialtu MLA Dr. K. Pachhunga, Lunglei DC Pu V Lalsangliana leh sawrkar hnathawkte, Lungleia College Principal-te leh lecturer-te, tlawmngai pawl aiawhte leh zirlai pawl aiawhte, media mite,khawtlang hruaitute, party hruaitute leh sawm bik dang mi thahnem tak an kalkhawm.

Lawmna programme Lunglei HPC Vice Chairman Pu Lawmawma Tochhawng kaihhruaiah khuallian Higher and Technical Education Minister Dr R Lalthangliana chuan MZU Southern Campus Lungleia din phalna hmuh a ni ta chu Pathian malsawmna ropui tak a ni tiin he Campus neih theihna tura sulsutute thawhrimna leh thahnemngaihna rah a ni, a ti a. MZU Southern Campus ti hlawhtling tur hian Department official-te leh MZU hotuten theihtawp an chhuah thu sawiin nikum chhung khan amah ngei pawhin sawrkar laipuia MHRD Minister leh Secretary-te hnenah vawi engemawzat a thlen thu a tarlang a. Zirna lamah Mizoramin hmasawnna tur tam tak kan nei a, degree nei satliah ni lova thiamna dahzai leh chhawr tlak kan neih a tul a ni tiin MZU Southern Campus chuan Mizo mipuite zingah zirna lama harh tharna a thlen ngei a beisei thu a sawi bawk. MZU Southern Campus ah hian class tan thuai thei tura hmalakna chak taka kalpui mek a nih thu pawh sawiin Pukpuia Engineering College building chu temporary campus atan cheng vaibelchhe sawmpakhat (11) senga thawm that leh siam that hna thawh mek a nih thu a sawi a. Permanent campus pawh Pukpui ram chhungah din tum a nih thu sawiin Campus leh building tha leh changtlung tak din ngei anih theihnan mipuiten neitu rilru pu chunga mahni zawn theuhah theihtawp chhuah turin Higher and Technical Education Minister chuan a sawm a ni.

He huna khualzahawm Lunglei West bialtu MLA leh Agriculture, Cooperation etc changtu Minister Pu C. Lalrinsanga chuan Mizoram University Southern Campus chu Mizoram mipuite, a bik takin chhim lam District - te tan malsawmna ropui tak a ni tiin he Campus neih theihna tura hun rei tak atanga hun leh tha leh ngaihtuahna lo sengtu zawng zawngte chungah lawmthu a sawi a. Mihring theihna leh thiamna tih hmasawn (human resource Development) leh ram hmasawnna (economic development) chu thil kalkawp tlat an ni tiin he Zirna In pawimawh tak hian hun lo kal zel turah Mizoram mipuite tan hmasawnna nasa tak ala thlen dawn a ni, a ti a. Education chu industry peng pawimawh tak pakhat a ni tiin kan State thenawm Meghalaya leh State dangte angin kan Zirna In ah te state pawn lam zirlai thahnem tak an rawn zir chuan kan ram economy pawh nasa takin a ti hmasawn dawn a ni, a ti a. MZU Southern Campus chu mipuiten tangkai taka an hman ngei theihnan duhsakna a hlan a ni.

He hunah hian Chairman, NGO Coordination Committee, Lunglei Pu Lalrotluanga pawhin thu sawiin MZU Southern Campus ti hlawhtling tur hian NGO hrang hrang intelkhawm ten kum 2008 khan NGO Coordination Committee an din thu a tarlang a. He MZU Southern Campus ti hlawhtling tur hian NGO Coordination Committee chuan kum tam tak theihtawp anlo chhuah thu a tarlangin he campus nawr chhuak tura chak taka hma la tu Higher and Technical Education Minister, sawrkar official-te leh MZU hotute chungah lawmthu a sawi a. Campus tha leh changtlung leh zirna tha tak kalpui a nih theihnan NGO Coordination Committee chuan theihtawp chhuah zel a tum thu a sawi bawk.

Dr.K.Pachhunga,MLA, Vice Chairman, Bamboo Development Board chuan lawmthu sawina hun a hmang a ni.
Sawrkar laipui Ministry of Human Resource Development, Department of Higher Education chuan January 17, 2020 khan MZU Vice Chancellor hnenah lehkha ziakin MZU Southern Campus chu Lunglei-ah din phalna a rawn pe a ni.

Higher and Technical Education Minister Dr R Lalthangliana hian vawiin khan Tlabung panin Lunglei a chhuahsan nghal a. Bangladesh leh India insumdawn tawnna tura hmun pawimawh tak Kawrpuichhuah naktukah a tlawh dawn a ni.