Champhai District Level Fire Prevention Committee buatsaihin ‘Kangmei Ven Hapta’ (Fire Prevention Week) vawi 21-na chu Mizoram hmun dangte rualin vawiin khan hman tan a ni. Kangmei Ven Hapta hawnna hun Champhai Venglai Community Hall-a neihah hian Champhai Bawrhsap Pu Mark Lalthanliana chuan Kangmei Ven Hapta 2020, ‘ Kangmei chhuak tur veng la, I ram chhan rawh ‘ tih thupui hmanga kalpui tur chu a hawng a ni.

He hunah hian Champhai Bawrhsap leh District Level Fire Prevention Committee Chairman ni bawk Pu Mark Lalthanliana chuan kangmei ven hapta hawnna hun neih ani chu lawmawm tiin, kangmei ven hapta chhung chauha kang mei ven tur tihna a ni lo a, khar ani dawn lo a, kangmei ven hna chu kan thawk chhunzawm zel tur a ni, a ti a. Champhai District mipuite chu kangmei ti chhuak lo tur leh a lo chhuah palh pawha theihtawp chhuaha thelh mih vat tum tura chahin kangmei ven hapta 2020 chu a hawng a ni.

Thusawitu dang Pu VL Chama Hnamte, President, Sub Hqtrs YMA Champhai chuan fimkhur tawk loh vanga kang mei chhuak thin chu sim a hun tak zet thu sawiin, pipute hunlaia kang chhuak thei laka an fimkhur thin ziate chhut nawn leha an hnen atanga inzir thar leh turin mipuite a chah a. Mihring te’n nungcha, thing leh maute kan mamawh reng avangin kan humhalh angai a, ram kang thelh hna chu mahni mawhphurhnaa ngaia thawkchhuak tur leh chhuan lo la awm turte tana ram nuam siam tum theuh turin kalkhawmte a chah bawk a ni.

He hunah hian Pu Lalduhthlana, DFO Champhai & Member Secretary, District Level Fire Prevention Committee chuan State leh District Level Fire Prevention Committee report a pek bakah powerpoint presentation hmangin kangmei ven kawnga hmalak ngaihzia leh hremna awm theite a tarlang a. Pu C.Lalbuatsaiha, Senior Fireman, Fire & Emergency Services Champhai chuan kangmei chhuah theih dan leh kangmei chhuak laka chet lak dante sawifiahin kangmei chhuah thulh huna Fire Station biakpawh theihna Contact Number-7628029288, 03831-234026 a tarlang a. Pu Lalhmingmawia Pachuau, President, MJA Champhai District kaihhruainaa kangmei ven kawnga intiamkamna lak anih hnuah Pu Thanliana Hauhnar, Range Officer Champhai chuan lawmthu sawina neiin hun a khar a ni.

ISFR-2019 report, December 2017 atanga February 2018 chhunga Satellite data hmanga zirchian danin, Mizoram pumpuia ram hring (Forest Cover) zat chu 85.41% a ni a, Champhai bikah 78.09% niin, District zingah a hniam ber a ni. Hemi hun chhung vek hian Forest Cover area chu Sq kilometre 180.49 in a kiam a, heng zinga Sq kilometre 115.21 a zau chu Champhai District chhunga mi niin, State chhunga a kiamna za zela 63.83 lai chu Champhai District-ah a thleng a ni. Mizoram pumah kum 2017 a Forest Cover zat chu 86.26 % anih laiin kum 2019 ah chuan 85.41% niin, Forest Cover kiamna hi za zela 0.85 a ni.