Vawiin khan Fire Prevention Week (Kangmei Ven Hapta) 2020 chu Lawngtlai DC Conference Hall-ah Lawngtlai Additional Deputy Commissioner Pu K. Laltlawmlova, MCS chuan a hawng.

Pu K. Laltlawmlova chuan kan ram hian keimahni lo chu hmangaihtu tur a neih loh avangin kan humhalh a tul tiin, kangmei ven kawnga sawrkar hma lakna chu mipuiin thlawp a, lo hal hun atana a bi tuk March ni 15 pawh zawm hram tum turin a ngen a. Kangmei chhuak avanga ramngaw mai ni lo, in leh lo kang ral awm thin chu veng turin sawrkar leh tlawmngai pawl hrang hrangte tan rual a tul tak zet tih sawiin, kumin Fire Prevention Week thupui, "Kangmei chhuak tur veng la, i ram chhan rawh," tih chu nunpui theuh turin kal khawmte a chah nghal.

He Week hawnna hi LADC-a District Council Conservator of Forests Pu K. Lalromawia'n kaihruaiin, Fire Prevention Week chungchang a sawi fiah a. Deputy Conservator of Forests (Wildlife) Pu C. Lalthankima kaihhruaiin mipui kal khawmte chuan ram tikang lo tur leh ramngaw leh nungchate humhalh tura thutiam an sawi rual bawk.

Vawiin Fire Prevention Week hawnnaah hian sawrkar department hrang hrang leh LADC-a officer te, VC leh tlawmngai pawl lam te an tel.

Fire Prevention Week hi Mizoramah AD 2000 kum atang khan hman tan niin, kumin hi a kum 21-na a ni a. Kum 2009 atang khan district leh village level fire prevention award sem tan niin, Mizorama district hrang hrang zingah Lawngtlai District hi kum 2010 & 2015-ah pakhatna, kum 2014-ah pathumna leh kum 2019-ah pahnihna a lo ni ve tawh a ni.

Kum 2015 atang khan Forest Survey of India (FSI) chuan satellite hmangin kangmei chhuak a awm leh awm loh vil tanin, fire alert a thawn chhuak thin a. Kum 2015 atanga 2019, kum nga chhunga kangmei chhuak chhinchhiah zat chu 13913 niin, he'ng hi lo hal 13132 leh ram kang pangngai 480 a ni a.

He FSI alert system hian kum 2015-a Mizorama kangmei chhuak a chhinchhiah zat chu 2469 niin, chu'ng zingah chuan lo hal 2351 awmin, kangmei chhuak pangngai chu 118 a ni a. Hemi hnu hian Mizoram chu kangmei ven kawngah a hma sawn zawnga kalin, nikum hmasa 2018 khan kangmei chhuak 2096 chhinchhiahah lo hal 1860 awmin, kangmei chhuak pangngai chu 20-ah a tla hniam tawh a. Nikum 2019 phei kha chuan kangmei chhuak chhinchhiah 1452 zinga 1357 chu lo hal niin, kangmei chhuak pangngai chu 12 chauh a awm tawh a ni.