Social Welfare Minister Dr. K.Beichhua chu National Deworming Day hmanna Govt.KVM High School, Chhinga Veng, Aizawl ah Khuallian a ni a, he hun hi National Health Mission Director Dr Eric Zomawia’n a kaihruai a ni.

Khuallian Dr. Beichhua chuan thu sawiin mihring nun a hun pawimawh ber chu kum 1- 19 inkar a ni a, he hun hi zirna leh sei len nana hun pawimawh tak a ni a, mihring puitlin huna kan nih dan tur hriltu pawimawh tak a ni, a ti a. Chuvangin sawrkar pawhin ngai pawimawhin, hmalakna hrang hrang a nei a, chung zinga hmalakna pawimawh tak pakhat chu National Deworming Day (NDD) hi a ni, a ti a. Naupang leh zirlai zawng zawngte rulhut laka an lo fihlim theih nan National Deworming Day (NDD) hi India ramah kum 2015-ah khan State/UT 11 ah bul tan a ni a, a hlawknate hmuh a nih hnuin India ram pumah February 2016 atang khan hman chhunzawm a lo ni ta a ni, a ti a. He hmalakna hi rulhut pai vanga natna hrang hrang thleng theite, thisen tlakchhamnate leh naupang than thu um bo nan a nia, kum 1- 19 inkarte tan kum tin vawihnih(2) rampum huapin a rual a rulhut hlo eitir na tur hun hi kalpui a lo ni ta a ni, tiin a sawi. Khuallian Dr. K. Beichhua chuan Mizoram ah pawh February 2016 atanga hman tan niin hmasawn chhoh ve zel a ni a, round hnu hnung ber August 2019-a neihah naupang sikul kal leh kallo 96.76% laiin Albendazole (Rulhut Hlo) hi an ei thei a ni, a ti a. Kumin National Deworming Day ah hian round hmasa aia thahnem zawka Albendazole Mum eiturin Mizoram chhunga zirlai leh naupang tleirawl Kum 1-19 inkar te a chah bawk a ni. Minister chuan vawiina Rulhut Hlo ei theilo leh ei hmanlo te tan sawrkar chuan February Ni 17, 2020 ah hian Mop Up Day neih a ni ang a, hemi ni ah erawh chuan hmaih hauh loa eiturin a chah a ni. Minister chuan Health Department bakah School Education Department, Women & Child Development, Rural Development Department leh Public Health Engineering Department thawktu te thawh hona leh thawhrimnaah lawmthu sawiin, hlawhtling taka National Deworming Day kalpui a nih theihnan duhsakna sang ber a hlan a ni.

Khuallian Dr. K. Beichhua chuan naupang hnenah Albendazole (Rulhut Hlo) eitirna hun a hmang nghal bawk a ni.

State Programme Officer (RCH) Dr. Lily Chhakchhuak chuan National Deworming Day chungchanga hriattur pawimawh hrang hrang te sawiin, zirlai naupangte hnenah hrilhfiahna hun a hmang a, Joint Director (FW) Dr. Vanlalsawma chuan lawmthu sawiin he hun hi a khar a ni.

National Deworming Day hi Mizoram district zawng zawngah a rual a hman a ni a. Sikul kal leh kallo, sawrkar leh private sikulte, pawh a huam vek a ni. He damdawi Albendazole hi sikul ah leh Anganwadi Centre (AWC) ah te a thlawnin a ni ruatbikah hian ei theih a ni. Rulhutpai lo turin tih theih awl sam tak te a awm. Chung te chu – kut silfai that te, thlai leh thei eitur silfai that te, tui thianghlim chauh in te, ekin tha leh thianghlim taka in thiarte, eitur khuh that te, in leh a vel vawn fai te leh pheikhawk bun te hi a ni. National Deworming Dat hi naupang leh tleirawl te hrisel zawkna atan leh an than lenna kawnga harsatna hrang hrang awmtheite sutkianna atana sawrkar hmalakna pawimawh tak a ni.