Vawiin khan Lunglei DC Pu Ashish Madhorao More, IAS chuan Bazar Veng, Lunglei-ah IDBI Bank Branch hmasa ber chu a hawng a. Bank hawnnaah hian IDBI Bank Aizawl Branch Head Pu Rovin Kami, NeDFI Lunglei Branch Manager Pu Lalhruaizela Fanai, Bazar Veng VCP Pu C.Lalbiakvela leh DIPRO Pi Mina Zoliani ten DC hi an tawiawm a ni.

Hawnna inkhawm IDBI Bank Lunglei Branch Head Pu Bankerlang Lyngdoh kaihhruaiah Lunglei DC Pu Ashish More chuan rampumah banking sector chu sector thangduang chak ber a ni a, chuvangin Bank hrang hrangte chuan hmun tam theih ang berah, a bik takin hmun kilkhawr zawkah te, Branch an hawn a tul a ni, a ti. Bank Branch tinte hian ATM Service nei theih ngei se, chu chu mipui leh sumdawngte tan pawhin sum khawihchet vel a ti awlsam thin a ni, a ti a.IDBI Bank chu sorkar laipui bultumsak a ni a, Bank hmingtha leh hnathawk tha tak tia hriatlar an nih thu sawiin DC chuan mipuite tan Bank dawr nuam tak an ni tiin a fak a ni. Mizoramah a lo chhuah hnuah leh Lunglei DC anga hna a chelh tan hnuah Khuallian ni tura sawmna a dawn hmasak ber a nih thu sawiin Pu Ashsish More chuan Lunglei mipuite tana chhenfakawm ni thei tura IDBI Bank Branch thar a hawng thei chu a lawm hle thu a sawi bawk.

IDBI Bank Aizawl Branch Head Pu Rovin Kami pawhin thu sawiin rampumah IDBI Bank chu hmun 985-ah Branch hawng tawhin ATM pawh 2300 an neih thu a tarlang a. Nikuma Bank hotuten Mizoram an tlawh khan he state boruak muanawm tak leh hmasawn chak tak an hmuh khan District tinah Branch thar hawn an relthlu nghal a; rampumah Mizoram State chu District tinah IDBI Bank nei hmasa ber tur a ni dawn a ni, a ti.

IDBI Bank Lunglei Branch hi Branch Head 1 neiin a hnuaiah Asst. Manager 2, Sub-staff 3 leh Guard 3 an awm a ni.