Vawiin chawhma dar 10:00 khan Lungleia Sacred Heart School-ah  chawlhkar hnih awh tur Intensified Diarrhoea Control Fortnight (IDCF) hawnna programme hman a ni a. Lunglei DC leh IDCF District Steering Committee-a Chairman ni bawk Pu Abhijit Vijay Chaudhari, IAS chu  Khuallian niin a hmanpui.

Pu Abhijit Vijay Chaudhuri chuan kawthalo (diarrhoea) laka inven hi kan tih mak mawh a ni a, mahni theuh kan pawimawh in, zirlai naupangte pawhin mahni zawnah tih tur pawimawh tak kan nei a ni, a ti a. Zirlai naupangte chu  thianghlim zawka in enkawl tur leh ei leh in a fimkhur turin a chah a. India ram hi kawthalo laka a fihlim theih nan theihtawp chhuah theuh turin a chah nghal a ni.

District Project Manager Pu Lalhmunsiama'n zirlai naupangte tana Hand Washing Competition buatsaih chu kaihruaiin,  kutsil danah in elna neih hmasak phawt a ni a. Zirlai naupangte hnenah an thiam dan indawtin lawmman sem nghal a ni. Lunglei DRCHO Dr. Johny Lalmuanpuia Tlau chuan naupangte hnenah kutsil dan dik a zirtir ve thung a ni.

A hawnna programme hi Lunglei CMO Dr. VLMS Dawngliana'n a kaihruai a. SMO leh IDCF Nodal Officer ni bawk Dr. Lalawmpuia Chhangte chuan IDCF chungchang sawi zauna te nei in, IDCF pawimawhna te a sawi a ni.

IDCF programme hi kum 2014 atang khan kumtin chawlhkar hnih chhung hman thin a ni a. Kumin 2016 hi a kum thumna niin, July ni 11 atanga July ni 23 thleng hian hman a ni leh dawn a ni.