Mizoram Press Accreditation Committee vawiina thukhawm chuan Mizoram puma thuthar thehdarhtu zinga mi 130 te chu Press Accreditation pek nise tiin an rawt a. Sawrkarin a pawmpui hunah Notification tih chhuah a ni ang a, chumi hnuah hlanna inkhawm buatsaih nise an ti a ni.

Mizoram Press Accreditation Committee hi Chairman Pu B. Lalthanliana, Secretary, Information & Public Relations Department in a kaihruai a. Hun rei tak Press Accreditation ngaihtuah loh va a awm hnuah, rules thenkhat siam that rawtna sawrkarah thlen a ni a. Chu chu sawrkar atanga tihfel anih hnuah Committee hi koh a ni ta a ni, a ti a. Press Accreditation pek danah hian rules a tehfung fel tak inziak anga dik taka ngaihtuah nise a duh thu a sawi a ni. MJA lam chuan sawrkarin an ngenna ngai pawimawha Rules Amendment hial a tih sak avanga an lawmthu Committee hmaah hian an sawi a ni.

Press Accreditation dilna uluk taka endik anih hnuin Mizoram pum atangin Journalist 130 te chu Accreditation pek turin an titlu a, Aizawl District – 53; Lunglei District – 19; Saiha District – 11; Lawngtlai District – 5; Serchhip District – 11; Champhai District – 10; Kolasib District – 11 leh Mamit District atangin 10 te an ni.

Accreditation hi peihfel anih veleh function siama, pek chhuah nise tiin Committee chuan a rel a, Department website ah accredited pressmen list pawh a hma anga tarlan leh nise an ti a ni.